Hábmera gibttsomsiebre jådediddje Sebastian Schifferdecker, ávvudallá ja la viek dudálasj gå Polarcup galggá Badjesijdan ásaduvvat.
– Gibttse viek hávsskudalli, ja ulmutja viek berusti!, javllá Sebastian NSA Nuorraj.
Polarcup la gibttsomgilpos ienemusát nuorra gibttsijda gudi sihti diehtet man tjiehpe li. Gilpos ij la nav duodalasj, ja juohkkahasj guhti l nágin gibttsomsiebre sebrulasj guovlos, bæssá fárruj.
Alvin Moe ja Thomas Paulsen libá guok vissjalis gibttse. Goappátja ájggoba Polarcupaj fárruj, valla ælla gal sunnun ållu sæmmi ulme.
Alvin sihtá finállaj bessat, madi Thomas vuolggáj fárruj suohttasa diehti. Tjielggiba lijkkuba gå gibttsomin li nav ållo hásstalusá, ja gievrru ájn de vil. Duodden galggaba báhtja guovtes viehkedit gilppusij gárvedit.
– Gibttsom la viek vuogas asstoájggedoajmma, besa ietjat hásstalit sihke rubbmelattjat ja psykalattjat, tjielggi Alvin.
Ásadiddje javlli gilpos sávadahttá ållit dárbov gilpostittjat ma li Råmså ja Nuorttalij Nordlánda gibttsij gaskan. Sávvi gilpos sjaddá æjvvalimsadjen nuorra gibttsijda ja sijá æjgádijda.
Ådåstuhtti Polarcupaj
Edna dugnadbargo ja profesjonálla válkavskruvvijiddje baktu, galggi ållu ådå gibttsomválkkamijt dahkat hállan. De la barggo vuostatjin skruvvit vuolus divna dæhkkojt, bassat dajt ja skruvvit dajt bajás vas váj ådå válkkamijt dagátjit.
Hábmera hálla gånnå galggi gilpustallat, ålliduváj nágin jage dássta åvddåla. Gibttsomhálla l ålles 18 miehttara allak, akta dajs alemusájs Nordlándan.
– Ållu oavdos gå unna bájkátjin Badjesijdan la nav fijna gibttsomhálla, javllá Sebastian.
Iehttsegådij sihke gibttsomav ja Hábmerav
Sebastian guhti álgos Dujskas boahtá la sihke gibttsomav ja Hábmerav iehttsegoahtám maŋŋela gå suohkanij jådij. Jagen 2019 ájtsaj Sebastian man suohtas gibttsom le, ja dálla jådet Hábmera Gibttsomsiebrev.
Sebastian la viek gijttogis ietjas stivrraguojmij åvdås. Stivran li sihke åhpadiddje, ja ietjá vissjalis gibttse suohkanis.
– Mij lip nav vuorbálattja gå miján li Knut Hamsun VGS/JS åhpadiddje gudi mijájt ålov viehkedi, javllá Sebastian.
Labut ietjá láhkáj
Sebastian alot juohkkahattjav gut ber máhttá, gibttsomijn álgget nav jåhtelit gå ber vejulasj. Suv mielas sihke rubmahav lásjmudallá ja hávsskudallá gibtsodijn.
– Gibttsom la viek buorre valástallam mij ienemus ulmutjijda hiehpá, ja viek suohtas la labudit ietjá láhkáj gå dábálattjat, låhpat Sebastian.