Moadda dájddaga: 106 dájddagij 68 dájddárijs, de sjattaj moattebelak vuosádus Ájluovta/Ájlátte sebrudakvieson. Gåvvå: Priváhta

Stuorra vuosádusájn bájke moattebelakvuodav ávvudallin

68 dájddárij, 106 dájddagij ja edna guossij Ájluovta/Ájlátte sebrudakvieson vuorbástuvvin dán ájllega amaterravuosádusájn “Kunst 8270 Dájdda”.


– Nuppádis dáv vuosádusáv ásadip. Vuostasj bále lij jagen 2020 koronaájggudagán ráddjimusáj, danen ittjij sjatta ållu gåk lulujma sihtat sjattaj. Dalloj aj soabmása båhtin, valla ællim gal sæmmi ålos dagu dán jage, tjielggi Svenn-Egil Knutsen Duolljá, guhti Anne Silja Turi ja Bruce Morén-Duolljá siegen la álgadam ja ásadam “Kunst 8270 Dájdda”. 

Vuosádusá sáhka l “jus dájdda duv ávvudahttá de lisj dávk iehtjádijda aj hávsske” ja dagu jagen 2020 lij dán jagásj vuosádus dán gålmmåsa luojvoj oasse Mihá Kultuvrraávvudallamis.

68 dájddára

Gå lidjin 106 dájddaga 68 dájddárijs poasstanummaris 8270, aktan kafiedja ja edna guosse, de ælla Svenn-Egilin makkirak gássjelisvuoda dáhpádusáv buorren adnet.

– Dán jage lij miján ådå huonaj, Ájluovta/Ájlátte sebrudakviesso l mijá aktisasjbarggoguojmme. Duodden vuosádussaj lij rabás lávvodakkafiedja ja ålos båhtalin, ienebu gå majt lidjin jáhkkám. Nav edna hávsskes ságajt lip gullam, subtsas Knutsen Duolljá.

Vijddásappot giehttu ienemus oasse dájddárijs lidjin mánájåroj- ja skåvllåmáná, ja nágin ållessjattuga ja hobbydájddára. Fállin juohkka lágásj dájddagav, duoje, mállidum gåvå ja akvarella, tjuorggama, gåvå ja tjabu dronegåvå.

– Viek hávsske gå dán jage lidjin nav edna ådå vuosádalle. Sij gudi sihtin guokta jage dássta åvddåla vuosádallat, vijmak duosstin dán jage. Jáhkáv dáhpádus álmmugav måvtåstuhtij, ulmutja li máj åhtsålam æjvvalimsajijt korona bále. Diedá nav vissjala lidjin.

Vuorbástuváj: Amaterravuosádusá "Kunst 8270 Dájdda" ásadiddje, Svenn-Egil Knutsen Duolljá, Anne Silja Turi ja Bruce Morén-Duolljá lidjin viek dudálattja ájllega dáhpádusájn. Gåvvå: Priváhta

Moattebelakvuodav ávvudallin

Vuosádus hávsskes láhkáj rabáduváj lávllagijn sámegiellaj ja hárppatjuojadibme kultuvrraskåvllåoahppe guoktás Ingebjørg Lie Jakobsen ja Julia Paulsen, dan maŋŋela tjuovoj hålla Anne Silja Turi ja Bruce Morén-Duolljá baktu sihke julevsámegiellaj ja dárogiellaj. 

– Uddni lip tjåhkanaddam avvudalátjit... ávvudalátjit dájdav, suohkana moattebelakvuodav, bájkema ja iehtjama! 

– Dán vuosádusá ájggomus la jåhtuj biedjat suohtas bájkálasj dåjmav, dahkat juojddá mij la sjuggelis ja ietjálágásj, buorebut nubbe nubbáj oahpásmuvvat ja bájkema rámmpot. Dárbahip ienep dássta! javlajga.

– Ájggomus la mij åvdedip iehtjama moattebelak poasstanummarav 8270 moatte láhkáj, ja dát amaterradájddavuosádus la aktisasjbarggoprosjækta tjerdaj, álldara, sjiervij, lándaj jnv rastá. Sávvap máhttá liehket álggon ienep suohtas ja sjuggelis dáhpádusájda váj ienebut aktij tjanáduvvap ja aktan barggap ja váj juohkkahasj dåbddå ietjas buorisboahtem ja dåhkkiduvvam.

Moaddásijt gijtijga

Hålan gijtijga aj divna dájddárijt gudi li garrasit barggam ja duosstam ietjasa dájddagav vuosádallat. Rámpojga aj Ájluovta/Ájlátte sebrudakviesov gudi uvsajt rahpin, ja káfa ja gáhkoj åvdås. Rággo Nord-Salten gründerforum a Nuortta-Sálto hæsstasiebrre gijteduvvin ruhtadoarjjaga åvdås, ja maŋutjissaj aj Hábmera suohkan ja Sámedigge rudáj ja ietjá doarjjaga åvdås. Gijtijga aj Hábmera suohkana kultuvrrajådediddjev Hilde Fredheim, guhti vuosádusáv rabáj.

Jårggålam: Lars Th. Kintel

Debatt
NordSalten Avis oppfordrer leserne til saklig debatt!
Tenk over hva man skriver og vis hensyn. Kommentarfeltet overvåkes av våre moderatorer. Grove overtredelser av normal debattskikk kan straffes med utestengelse.