Nilssa ja suv gieres Ella máhtsajga Gásluoktaj 1970-lågo gassko ájggomusájn bájkálasj sebrudahkaj viehkken liehket, subtsastij Nilssa iesj mijá avijssaj. Ásadijga Nimek AS:av, vidnudahka mij ittjij dåssju barggosajijt buvte, ájnat aj mihásvuodav tjoahkkebájken. Nimeka baktu ásadijga vuodov mij lij nuorajda, moaddása sijájs sáme máttojs, viehkken barggoiellema sisi.
Suv rahtjamus sáme kultuvra ja giela åvdås la árbbe mij sjaddá viessot åvddålijguovlluj. Njunnjutjin lij gå Árran julevsáme guovdásj ásaduváj, ja NSA:aj giehtoj gåktu dat sáme fábmoguovdátjin sjattaj. Nilssa vuosedij gåktu ájálvisá máhtti duohtavuohtan sjaddat garra bargo ja sávresvuoda tjadá. Suv vattáldagá ulmutjijt tjoahkkit ja gássjelis prosessajt jådedit lidjin guovdátjin váj guovdásj vijmak rabáj jagen 1994. Valla Nilssa ij lim ber sebrudaktsieggijiddje. Subtsastiddje lij aj, mentåvrrå ja familljaj stáddán. Sidjij gudi lidjin suv lahka, lij någådik gálldo vijsesvuohtaj, rádijda ja arvusmahttemij. Suv gieresvuohta luonnduj, várráj, láttagijda ja bivdduj, spiedjilastij man tjiegŋalit Divtasvuodnaj ja julevsáme kultuvrraj gulluj. Nilssa agev åvddålijguovlluj gehtjadij, valla ittjij goassak vajálduhte dav mij lij læhkám. Suv barggo politihkan, Sámedikken ja bájkálasj æládusprosjevtaj vuoset iellemájge mielav sihke bájkálasj sebrudagáv ja sáme kultuvrav nannit. Dáj bágoj sihtap suv gijttet. Suv bargojs li tjiegŋalis láhtto báhtsám, ja suv mujtto sjaddá viessot åvddålijguovlluj Árranin, Divtasvuona sebrudagán, suv bargon ja juohkkahattjan guhti besaj sunji oahpásmuvvat. Vuojŋadalá ráfen, gieres Nilssa. Duv sjaddap åhtsålit, valla ij vajálduhttet.
Les også:
