Almmudahka Legatum Publishing sijá almmudiddje Tore Rasmussen baktu subtsasti sij lidjin Hamsunbiejvij rahpamin sådnåbiejve gåvvitjit ja vuosedittjat Hamsun ájn viessu, dálla jiednagirje baktu mij la dahkojiermes dagáduvvam.

Rasmussen subtsas sijájt li buoragit duosstum rahpambiejve.

– Ulmutja li diehtemvájnugisá, miján lidjin moadda miellagiddis ságastallama AI, Hamsun, dájdabargoj ráddimriektá birra ja ållo ienep, subtsas sån guhti åvdet prosjevtav man birra l stuojmme sjaddam.

Ij la aktak nievres láhkáj giehttum dáppe?

– Diedá ælla miján læhkám negatijva vásádusá. Diehki vuodjet li tjábbe, ulmutja li nav væhttsá ja rahpasa. Hávsskes vuostasj biejvve Hamsunbiejvijn, tjielggi Tore.

Joarkká giehttomin buorástahttám la sihke festivála oajvev Anita Overelv ja Hamsunguovdátja direkterav Solveig Hirsch.

– Vuogas ságastallam lij, sivilisieriduvvam ságastallam ulmutjij gaskan gudi Hamsunij lijkkuji, javllá låhpan dan birra gå festivála jådediddjijt iejvvij.

Hamsunguovdátja direkterra Solveig Hirsch ij la vásstedam gå avijssa l suv gæhttjalam ságajda oadtjot.

– Spekulatijva ruhtse, javlaj áddjov Regine Hamsun avijssaj VG.

– Mijá mielas la vastes dahkat dahkojiermes dagáduvvam jienav ádjás. Sån lij má bieljedibme, ja dat má suv jiednaj vájkkudij. Gå mij familjan javllap dát la kynihkalasj adno, de la muv mielas viek vájvve gå dav e vieleda, javlaj tjielggasit VG:aj.

– Buoragit guládallap Hamsun berrahijn, dán birra aj. Doarjjun Regine Hamsuna åvdep javllamusájt Hamsun ja AI-ássjen, javlajga Anita Overelv ja Hamsunguovdátja direkterra Solveig Hirsch VG:aj.