Navti arvusmahteduváj ietjas TikTokav dahkat, ja oanegav dan maŋŋela almodahttjáj Hábmelvierik sisanov «Bengineering» namájn. Jåhtelit ájtsaj moaddásijt dejvaj edna berustimijn, moadda gæhttjij ja likes. Sisadno lij ienemusát iellema birra, vloggaj árggabiejvestis sihke kulissaj åvddålin ja duogen. Sisano buojkulvisá li vlogga muhtem biejves bargon åhpadiddjen, gåktu hárjjidallá, jali gå la vuolggemin juosik. Akta kanála bivnnusamos rájdojs li «fysisk testa», gånnå gæhttjal fysihka gájbbádusájt bessat duola dagu militerraj ja politijjaallaskåvllåj.
– Ulmmejuogos li sij gudi li 15 ja 30 jage gaskan, gudi hárjjidallamis, mannamis jali skåvlås berusti. Gå vuojnáv statistihkav demografijja hárráj de sijájt buoremusát dejvav, vájku diedáv nuorabu ja vuorrasappo aj tjuovvu, subtsas 24-jagák.Sihtá åhpadiddje virge birra giehttot
Benjamin ållij åhpadiddje åhpadusáv jagen 2023, ja dallutjis la dajna barggam. Sávvá ja ájádallá video máhtti viehkken buoredit dádjadusáv majt dat duodaj merkaj, sihke bargon ja asstoájgen. Iesj bargon ihkap buorebut dádjat åhpadiddje e dåssju åhpada, valla siján li aj tjåhkanime, bargo åhpadime åvddåla ja maŋŋela, ja diedon mij duodaj tijmajn dáhpáduvvá. – Jáhkáv moaddása vuojnni åhpadiddjev ulmutjin gev skåvlån gávnná, ja dåppe ålles suv iellem dáhpáduvvá. Gå juogáv iellemav ietján duodden, nuorra ulmutja vuojnos guhti l 20-jagij sinna, de dåbdåv viehkken lav åhpadiddjijt gåvvitjit dábálasj ulmutjin, tjielggi Benjamin. Åhpadiddjevirgge l akta dajs virgijs Vuonan gånnå vuordeduvvá galggá dahkat riekta ja åvddågåvven liehket. Danen máhttá priváhta iellemis juogadit hásstalit. Dát la gal dádjadahtte, danen gå åhpadiddjen la edna åvdåsvásstádus ja ålov mánájda ja nuorajda vájkkut. Danen 24-jagák viek árvustallá ja ájádallá åvddål juojddá almot, valla sæmmi båttå ájádallá galggá bessat ietjas duohta iellemav aj vuoset, vájku åhpadiddjen barggá. – Vájku ienemusát vuosedav iehtjam «åvddågåvven» bargo, hárjjidallama jali ietjá tjuolmaj hárráj, de lav ber dábálasj báhttja 20-jagij sinna guhti dagáv majt dábálasj ulmutja muv álldarin dahki. Mån lav rádnaj siegen, festajda ja konsertajda manáv, ja boasstot dagáv. Dá li iellema duohta biele ålgutja duogen majt sidáv ulmutja galggi vuojnnet ja ietjasa dåbdustallat. Ij la aktak perfækta ja vuojnnet ulmutja lijkkuji gå dav javllá, subtsas Hábmelvierik.
