Dán ájllega åvddånbukti Badjesijda russa ietjasa ådå revidjav vuostasj bále. Hamsunguovdátjin bierjjedagá guovvamáno 16. biejve kl. 19.00 ja lávvodagá kl. 18.00 galggi åvddånbuktet. Reviddjaoajve Marte Berre ja Maja Åsbakk javllaba gæhttjijda sjaddá geldulasj showa edna suohttasij.

– Vuoj gåk ávvudallap, javllaba.

Edna gárvedibme

Reviddjaoajvven la Majan ja Marten læhkám ållo dahkat maŋemus vahkojt. Guhka iehkeda li sjaddam gå li mánusijt tjállám sketsjajda.

– Maŋemus vahkojt lip vargga jámas barggam váj galgajma ållit, subtsas Maja.

Maŋemus biejvijt la ålles russavehka tjåhkanam reviddjaj aktan hárjjidalátjit. De dåk maŋŋeiehkedij aktan barggi. Kristian Winther la russajda viehkken buorre revidjav aktij måsskimin.

– Edna gijtto Kristianij. Buktám la midjij ådå fámojt ja vuogas lij gå soames profesjonálla lij mijájt viehkedime, subtsastibá næjtso.

Vájku ednagav li hárjjidallam ja gárvedam de la juogos måvtuk, reviddjaoajve Maja milta.

– Vuogas lij vuojnnet reviddja l juo hámes gávnnam hárjjidaládijn juo, javllá Maja.

Edna vuorddemusá

Gå guhkijt li barggam ja duollistam revidjan de nuora ávvudalli gæhttjijda åvddånbuktet. 

Majt gæhttje galggi dijá revidjas vuorddet?

– Revidjan li segaduvvam parodijja, politihkalasj sisadno, lávllaga, musikála ja sketsja duon dán vidjura birra duoppet dáppet, subtsas Marte.

– Ållo revidja humoris la «Vanáduvvam», duoddis Maja.

Næjtso subtsasti sij gudi båhti gehtjatjit galggi vuorddet «buoremus gudik goassak» revidjav. Ja moadda gæhttje tjáhki.

– Juohkka åvddånbuktemin li 170 saje ja besalvisájt gávna Facebook-dáhpádusán «Russerevy 2024». Máhtá aj besalvisájt giehtaj oadtjot Hamsunguovdátjin, valla ávttjip juohkkahattjav besalvisájt oasstet åvddåla, javllá Marte.

– Sávvap gájka gudi ber bessi båhti gehtjatjit, duoddis Maja låhpan.

Jårggålam: Lars Th. Kintel