Russeájgge l ájnas oasse joarkkaskåvlås moadda oahppijda gudi ålliji. Maŋemus ájgijt la læhkám edna sáhka eksábmaájgev maŋedit. Oslo åhpadusráde oajvvat ságájdahttemin VG:ajn russeájgev maŋedit eksáma maŋŋelij. Mij NuorttaSálto Avijsan lip ságastam russepresidentajn Stine Nilssen gulátjit majt sån miejnni oajvvadusá birra.

– Dát lisj dávk buorre oajvvadus. Eksábmaájgge l stressa munji ja dávk muv guojmmerussajda aj. Dálla vuoratjismáno álgon juo, ja sjattasj dávk væráp gå moarmesmánno lahkan, subtsas Stine.

Vijddásappot tjielggi russeájgge máhttá eksámabåhtusav biejsstet.

– Iv gal jáhke russeájgge l jur buoremus vuohke eksábmaj gárvedit. Ij la gal makkirak tjiegosvuohta daj biejvij ij sjatta heva studierim. Danen luluj vuogas vuostatjin eksámav tjadádit váj de bæssá vuojŋadallat, ávvudallat ja dåssju fokusierit rádnaj siegen suohtastallat, javllá Stine.

Tråmsån li 2021 rájes juo russeájgev tjadádam eksábmaájge maŋŋela. Gå NRK ságájdahtij Tråmså maŋemus jage oahppijt, de gullunagi åbbålattjat lidjin dudálattja. Navti lisj dáv buorre ájálvis russeájgev sirddet eksábmaájge maŋŋelij.

Árbbedábe ihkap gáhtu

Russepresidænnta miejnni jus russeájgev sirddá de ihkap dálásj russedábe ma buolvas buolvvaj li mannam dálla boarkkiduvvi.

– Dáppe Hábmerin li miján nanos árbbedábe russeájge. Duola dagu de la dábálasj russa festajt dahki ijájn åvddål moarmesmáno 1. ja 17. biejve. Duodden la má aj muhtem lágásj poæŋŋa russeájgge galggá låhpaduvvat nasjonalbiejve moarmesmáno 17. biejve, miján li vuojn nágin dábe ma dan bæjvváj aj li tjanáduvvam. Divna russa li fáron skranglerájdon idedis, miján la aktisasj moarmesmáno 17. biejve-idedisbiebbmo ja de galgav mån presidænntan hållat, giehttu Stine.

NSA gatjádij aj Stines majt sån lij válljit jus lij bessat mierredit?

– Dav ij la ber javllat. Diedá jáhkáv lidjiv sihtat russeájgev vuostatjin tjadádit. Vuostatjin dábij diehti. Ja de la má russeájgge aj stress avta láhkáj. Edna l masi galggá gárvedit ja plánit, dagu festa ja ietjá dáhpádusá. Jáhkáv farra lidjiv sjaddat russeájgev ájádallat gå eksámav vuorodit – ja navti lidjiv hárrut, javllá Stine.

Ájádusá russeájge birra

Russepresidænnta buktá aj ietjas ájádusájt russeájge hárráj. Dábe milta de la dat agev læhkám eksámaj bále moarmesmánon.

– Álgos lav viek buorremielak russeájggáj. Dat la ávvudallama ja ávo ájgge, ja munji l viek hávsskes vuohke joarkkaskåvlås ållit. Nuppe bielen la má russeájgen stuorra vádá juoga máhttá boasstot gevvat. Russeávvudallam la álu medijáássjen, gullap givsedime, vahágahttema ja gárevselgaj birra, danen la viek ájnas russa guhtik guojmesa huksi ja sæmmi båttå bájke ulmutjijt vieledi. Iv galla jáhke dát sjattasj makkirak gássjelisvuohtan dán jage russajda, danen gå hávsskep ja suohttasap vehka ij gávnnu, javllá Stine maŋutjissaj.