Javllamánon 2023 almoduváj TQC sjaddá Bodø/Glimt ådå oajvvepartner 2024-2026 ájggudahkaj. Dat merkaj duola dagu Glimt boahtá Ájluoktaj akti jahkáj bállotjiektjamdåjmav tjadádittjat tjiektjijda ja hárjjidallijda. Juogos galggá aj oassálasstet jahkásasj dugnadbæjvváj mav TQC tjadát Ájluovtan.

Biehtsemáno 20. biejve boahtá Bådådjojuogos Ájluoktaj bállotjiektjamskåvlåv ásadittjat mánájda Ájluovta VS siegen. Dáv máhtij Ájluovta VS jådediddje Lars Filip Paulsen javllat sijá rålla hárráj boahtte dáhpádussaj.

– Mijá barggo l dilev láhtjet váj bessi bállov tjiektjat saljon. Lip sihke TQC ja Bodø/Glimt siegen dási gárvedam, ja bállotjiektjamij jali bállotjiektjamskåvllåj valástallamsiebre baktu diedet. Tjoahkkáj gåhttjop gitta 100 máná ja nuora jahkedásijs 2006-2019 oassálastátjit. Åvdemusát Nuortta-Sáltos, valla iehtjáda aj bessi fárruj jus ælla nuoges bájke máná gudi diededi. TQC russti dán biejve ja dasi gárvedi. Dat merkaj kafiejas vuobdatji, gárvedi dárbbagijt, hivsigijt ja ietján, subtsas Lars Filip NSA:aj.

Lars Filip la viek mielos TQC aktisasjbargguj Bodø/Glimtajn ja subtsas sjaddá hárjjidallij forum bállotjiektjamskåvlå maŋŋela. 

– Sávvap aktan viek hávsskes biejvev dahkap. Sierraláhkáj mánájda ja nuorajda. Valla iehkedis Bodø/Glimt aj ásat hárjjidalle forumav masi sávvap æjgáda, hárjjidalle ja ihkap ådå hárjjidalle ietjasa diededi, javllá Lars Filip.

Danen gå industrijjagigánnta ja Bådådjojuogos galggi gålmå jahkáj aktan barggat vuostatjin dal ájn, de sjaddá dát jahkásasj dáhpádus desik aktisasjbarggo nåhkå jagen 2026. Jus de e ájn vil guhkeda dav, diedon.