Dav tjállá Miriam Paulsen muhtem interpellasjåvnån Hábmera suohkanstivrraj. 

Paulsena ja Gårobelludagá mielas la Skutvijkka læhkám låsså dilen mij dálla vuojnnet vijmak la nåhkåm.

– Positijva dåjmaj diehti duola dagu Arctic Salmon Center, Hábmera Montessoriskåvllå ja Punjjorda de ienep ulmutja dán guovlluj ásadi, tjállá Paulsen interpellasjåvnån.

Belludagá milta la ållo dæddo mánájgárddesajijda Hábmera suohkanin boahtte tjavtja rájes, ja gåhttju suohkanav gehtjadit máhttelisvuodav Skutvik mánájgárdev vat rahpat.

– Hábmera Gårobelludahka dájna gatját majt lihpit dahkam gehtjadittjat máhttá gus Skutvijka mánájgárdev vat rahpat ja gåktu de barggij vidjura sjaddi? Åvddål ietjá tjoavddusijt gehtjat, de ánssit Skutvijka mánájgárdde jut almma láhkáj árvustallá máhttelisvuodav vat rahpat, tjállá Paulsen.

Sån aj tjállá vuorddá ienep máná riegádi Skutvijkan boahtte jage, ja ållo dæddo l báhtariddjijda aktan mánájda årromsajijt gávnnat.

– Skutvijkav gárvedit mánájt ja ulmutjijt duostotjit buorre mánájgárddefálaldagá baktu, luluj bájkev ja Hábmerav viek låpptit. Dan diehti gåhttjop ruvámus láhkáj guoradaláduvvá máhttelisvuohta vas Skutvijka mánájgárdev jåhtuj oadtjot, bádtji Paulsen ja Hábmera Gårobelludahka.

Jårggålam: Lars Th. Kintel