Dálla l skåvllåjahke ållim oahppijda Vuonarijkav miehtáj. Soabmása li joarkkaskåvlåjn ållim. Kristian Urfjellmo ålli Knut Hamsun JS:as ållu maŋemus vahkkotuvrajn.

– Mijá maŋemus vahkkotuvrra lij Sulisjielmmáj. Dåppe jieŋa nanna guollijma, ejma gal guolijt giese, iglov biggijma ja spelajma ållo kårtåjt sihke teltajn ja hyhton. Dát lij galla viek buorre tuvrra, subtsas Kristian.

Árggabiejves båddå

Ålggoiellemlinnjan li oahppijn gålmmå vahkkotuvra. Akta tjavtjan váttse, nubbe dálven tjuojga ja goalmát gidán kajáhkajn jali kánujn. Danen gå Kristian lij ietjas ållu maŋemus vahkkotuvran skåvlåjn, de gatjádij NSA mij la læhkám buoremus vahkkotuvraj.

– Lisj dávk båddå árggabiejves ja unnin bessat juohkka vidjuris mij dáhpáduvvá, javllá Kristian midjij.

Gåktu l læhkám oahppen liehket Knut Hamsun JS:an? 

– Viek hávsske l læhkám, dát la máj unna skåvllå gallegasj oahppij, valla sij li viek oavddusa. Gå li nav gallegasj oahppe de bessi åhpadiddje oahpásmuvvat oahppijn sihke ulmutjin ja fágalattjat, ja navti åhpadiddje bessi ienebut hiebadit ja buorebut árvustallat, tjiegŋot Kristian.

Kristianij la ålggoiellemlinnja læhkám suohtas muossádibme edna hásstalusáj. Sunji l læhkám viek buorre gå linnja oadtju suv ålgus komfortsåvnås. Duodden boahtá Storforsheias Ranan. Sunji ij la iellem Badjesijdan læhkám ráddjiduvvam, gå sån vuojn soapptsu smáv bájkijn.

– Ihkeva buoragit guojmmeoahppijda oahpásmuvá, sijá siegen la skåvlån, teltan idjada ja aktan lip iehketbiejvijt. Dájn gålmåjn jagijn oattjo álu båttåjt tijmajs, ja navti l ihkap álkkep joarkkaskåvlåjn ållit. Jáhkáv gájkaj åvdås sáhkadav gå javlav båttåtja li viek vuohkasa. Ájnna mij ihkap la vehi nievres guovlluj li divna bierggasa majt dárbaj, valla vuorbbe midjij de bessap BUA:s luojkadit duov dáv, subtsas Kristian.

Ájnna majt Kristian sihtá lájttet li hybelårudagá ælla heva ájmon.

– Hybelfálaldahka gal gávnnu, valla muv mielas galla bierriji nágin hybelijt divudit. Sluogas la árrat hybelav åhttsåt, danen gå jus la nuolle de dávk i besa válljit, subtsas Kristian.

Kristian viek májnnu ålggoiellemlinnjav iehtjádijda gudi galggi joarkkaskåvlåj åhtsåt ja gudi li gallánam skåvllålanján tjåhkkåhimes gætjo biejvev.

– Duodaj májnov ålggoiellemlinnjav! Álggiv dábálasj oahppuj, valla guovte máno maŋŋela de muv mielas sjattaj ilá ållo sjávot tjåhkkåhit, ja de målssuv ålggoiellemlinnjaj dáppe Hábmerin ja dan maŋŋela iv la gudik goassak sáŋardam. Mujna li læhkám gålmmå suohtas jage madi lav oahppomáhtudagáv oadtjum. Vájku suohtastallap, de dal aj vehi barggap. Galggap má oahppomáhtudagáv aj oadtjot, valla oattjo má aj båttåtjijt ma mielav ietjá guovlluj doalvvu, låhpat Kristian.

Jårggålam: Lars Th. Kintel