Dán tjavtja oattjojga vijmak hárjjidalle Bjørn Allan Fagernes ja Torgeir Nilsen Nuortta Sálto akademijjav ållåsit jåhtuj. Akademijja l duodde fálaldahka sidjij gudi sihti bállotjiektjamav vuorodit ja ietjasa tjehpudagáv ådå dássáj åvddånahttet. Hárjjidalle akademijjan sávvi næjtso Nuortta Sáltos galggi rijbadit stuoráp juohkusij vuosstij stádajs.

– Dáv fálaldagáv lip moadda jage juo sihtam hiebadahttet, subtsas Bjørn Allan.

Fálaldahka gájkajda

Hárjjidalle dættodi dát la duodde fálaldahka næjtsojda 14-17 jagij gaskan. Ja sihti akademijja ij galga bájkálasj klubbajda biejsstet. Fálaldahka l gájkajda gudi sihti ratjástit váj sjaddá nav tjiehppe gå máhttelis. Hárjjidalle jáhkki akademijja galggá spællárijt viehkedit "lávkkit" bállotjiektjen.

– Ij la mijá ulmme dán guovlo juohkusijt biejsstet jalik hieredit, dættot Bjørn Allan. 
 
Hárjjidalle Bjørn Allan gijttá aj The Quartz Corp dårja ja aktisasjbargo åvdås mav Nuortta-Sállto akademijjan li fállam. Duola dagu li akademijja biktasijt máksám. Hárjjidalle l ihkeva ávon gå TQC viehket ållidit, mav mælggadav la sávvam Nuortta-Sálto nuorra bállotjiektjijda.

– Ihkeva buorre gå TQC le fáron doarjjomin ja navti vehi bájkálasj sebrudahkaj máhtsat, javllá Bjørn Allan.

Måvtugis næjtso

Da gålmmå nuorra tjiektje: Frida - juohkusa kaptæjnna, sadjásasj kaptæjnna Marlene ja mållagáhttár Silja li riek dudálattja dájna ådå fálaldagájn. Næjtso li guhkijt vuorddám fálaldagáv sidjij gudi sihti buorebun sjaddat. Divna li bállov tjiektjam juo unne rájes ja måvtåstuvvam hárjjidalátjit ienebut vaj ájn buorep bállotjiektjen sjaddi. Næjtso doajvvu akademijja máhttá sijájt viehkedit alla dássáj åvddånit, ja sávvamis ienebut gilppusijt vuojttet.

– Riek suohtas le ådå tjiektjij siegen spellat, subtsas Badjesijdak Frida Herseth Skoglund.

Næjtso guorrasi aj fálaldahka le sihke ájnas ja buorre Nuortta-Sálto bájkijt aktij tjanátjit, ienni gå dåssju sijddabájkenisá tjiektjat. Navti buorebut ådå rádnaj oahpásmuvvi. Sidjij la ájnas gå akademijja hárjjidallama li alep dásen.

– Mav buoremusát lijkkuv akademijjajn le gå lip juogos næjtsojs nav moattet bájkes, subtsas  Ájluovtak Marlene Ellingsen.

Fridan ja Marlenen ij lim ållu tjielgga ulmme ienni gå buorep tjiektjen sjaddat, madi gáhttárin Siljan lij stuoráp ulmme ja niehko mij galgaj ålliduvvat. Silja l aj læhkám Nordlánda talentæjvvalimijn ja tjiektjá Nuorttalij-Vuona guovllojuohkusin.

– Sávav nav tjiehppe sjaddat vaj avta biejve besav rijkakámpav spellat. Diedáv dát la rahtjalis ulmme, valla jus ber nuohkásav hárjjidaláv de dav nagáv, javllá Silja Braseth Ellingsen Trádnás.

Nuortta-Sálto næjtso vuojttin

Åhpadiddje Bjørn subtsas siján li stuorra vuorddemusá åvddålijguovlluj. Juo ájllega gålgådismáno 27-29 biejvijt oassálasstin næjtso Stopp Volden-cupan Bådådjon. Vuodulasj tjehpudagá ja aktijvuoda tjalmos, ja tjielggasit suohtastallat, miejnni Bjørn Allan, sij máhtti tjuodtjot buoremus juohkusij vuosstij. Ja dav de dahkin.

Akademijuogos vuojttin ålles Stopp Volden-cupav. Buoragit manádin åvddålijguovlluj juogosspela maŋŋela, ja biellefinála sjattaj dagu triller. Tjiektjin Grand Bodø vuosstij ja álgos 0-3 vuollelin sjaddin, åvddål bajás jåhtin ja vuojttin 4-3, navti finállaj bessin. Dát oajbbom lij galla sierraláhkáj hávsske næjtsojda gå dán Grand juohkusa vuosstij li rahtjam tjavtja rájddotjiektjamin. Finálan Innstranda vuosstij sjattaj Marlene Ellingsen matchvuojtte, ja 1-0 vuojtojn válldin Nuortta-Sálto næjtso pokálav fáron sijddaj.  
 
Jårggålam: Lars Th. Kintel