Girjen snjuktjamáno 30. biejves tjállá Stáhtaháldadiddje gåktu Divtasvuona marijna suodjalimplánajn manná. Girjes boahtá åvddån Råmså universitiehtav li bargadahttám gávnatjit gåktu li vidjura sámij rievtesvuodaj hárráj ma guosski vuona marijna ressursajda.

Girjen tjálli barggo álgij snjuktjamánon, ja ulmme l dajna galggi ållit giese badjel jali árrat 2026 tjavtjan. Tjielgadibme galggá juridihkalasj metåvdå milta tjáleduvvat, ja dan vuodo galggá dálásj máhtto, sihke fáktá ja juridihkalasj máhto. Stáhtaháldadiddje tjállá aj ihkap universitiehtta válldá aktijvuodav sijáj gesi girjje l tjáleduvvam, bargo nalluj.

Vijddásappot tjállá Stáhtaháldadiddje dáv tjielgadi danen gå Divtasvuona bájke sáme li dav ánodam. Sæmmi båttå dættodi dát ij ållåsit vássteda divna dárbojt ma li diededuvvam, valla dát guosská avta guovdásj gatjálvissaj mav bierri tjielgadit åvddål pládnaprosæssa máhttá joarkket.

Gárvedahtte barggo

Dættodi aj ælla ájn diededam suodjalimplána formála álgov, ja navti l dát tjielgadibme gárvedahtte barggo.

Girjje boahtá ássjen gånnå Vuodnabat Sijdda l åvdebut viek tjielggasit diededam prosæssa hæhttu rievddaduvvat jus galggi boahtte bargojda luohtedit. Notáhtan mav Stáhtaháldadiddjáj gálggijin dijmásj rádudallamij bále, bårggemánon, de sijdda dættodij sijá bieles ij la prosæssa rievtugis.

Danna tjállin rievtesferdukvuohta dákkir ássjijn ij la dåssju boados, valla aj gåktu sij gesi dat guosská bessi fárruj bargguj. Låpptijin «almma oassálasstema» dárbov, gånnå bájke ulmutja ja rievtesvuodaj åmastiddje li ságaj ja mærrádusáj guovdátjin.

Sijdda l aj åvdebut vuosedam dasi jut  bájke sáme ietja galggi bessat háldadit guovlo ietjas premissaj, dárboj ja riektálasj stáhtusa milta. Sæmmi båttå li dættodam dákkir prosessajda oassálasstet gájbbet máhtov, kapasitiehtav ja ressursajt ma sijá bieles e gávnnu uddni.