Gründersamling Hamarøy la ådå prosjækta mij galggá tjoahkkit nuorajt gudi sihti ietja dahkat juojddá. Ulmme l nuorajt arvusmahttet ájádusájt åvddånahtátjit ja maŋenagi ietjasa vidnudagájt álgadit.

– Ájggop nuorajda vaddet vuollegis æjvvalimsajev gånnå bessi álgadime birra oahppat, madi hávsskudalli ja suohtastalli, javllá Rannus Kunto, guhti Hábmera Nuorajráde åvdås prosjevtav jådet.

Æjvvalime galggi skåvllåájge ålggolin ásaduvvat, ja dajda galggi aj bájkálasj álgadiddje boahtet, vidnudagájs ájádusá ja aktisasjbarggo duola dagu Ungt Entreprenørskap ja KPB (Kunnskapsparken Bodø) siegen. Vuostasj æjvvalibme l ragátmáno 25. biejve.

– Midjij la ájnas nuora bessi oahpástuvvat sihke vidnudagájda ja oahppobirrasijda. Gå gullap almma subttsasijt álgadiddjijs ja oadtjop konkriehta vædtsagijt iehtjama ájádusáj barggap, de jáhkáv moaddásijt måvtåstuhttá, subtsas Rannus.

Mávsulasj fálaldahka

Hábmera Nuorajráde mielas dákkir lágásj fálaldagá e suohkanin gávnnu.

– Miján li dåssju nágin gallegasj æjvvalimsaje gånnå nuora bessi ietjasa berustimijt åtsådit návti. Álgadiddje æjvvalibme sjaddá ariedná mij sihke berustimev ja máhtudagájt tsieggi, javllá Rannus.

Prosjevta ulmme l aj viehkken ájn vil nannusap álgadiddje kultuvrav ásadit suohkanij.

– Sávvap dát máhttá liehket álggon juosik mij vihpá, ja Hábmera nuora jáhkkegåhti bukti ietjasa vejulasjvuodajt dahkat dáppe sijdan, dættot Rannus.

Aktisasjbarggo ja bájkálasj tjanástahka

Prosjevta duogen la Hábmera Nuorajráde ásadiddjen, Hábmera suohkana, Hábmera Æládussiebre, KPB (Kunnskapsparken Bodø) ja Ungt Entreprenørskap siegen. Bájkálasj álgadiddje galggi aj gåhtjoduvvat viehkken.

– Viek buorre l gå miján li aktisasjbarggoguojme ma máhtti sihke doarjjot ja vásádusáj viehkedit. Navti sjadd1 æjvvalime nannusabbo, ja nuorajda fállap juojddá duottev, javllá Rannus.

Nuorajráde prosjevtav giehtadaláj tjåhkanimestis moarmesmáno 5. biejve, ja dálla li plánimin ja tjadádimen dáv.

– Mijá ulmme l ásadit stuoves juohkusav oassálasstijs gudi dássta berusti. Jus dájna vuorbástuvvap, de máhttá buoragit vájkkudit ålles suohkanij, låhpat Rannus.