Moarmesmáno dáhpáduváj goalmát Ung Arctic Gaming Experience (UNG AGE), Ájluovtan. Ájllega tjadá oassálasstin badjel vihttalåge nuora geldulasj dáhpádusájda ja E-spårtå gilbbusij. Dáhpádus dievaj, ja nuora Hábmeris, Stájgos ja Narvijkas båhtalin. 

E-spårtå gilbos

Nuora álldarin 13-16 jagága bessin oassálasstet e-spårtå gilbbusij. Spælla manna lij gilbos lij bijllavuodjemspælla «Trackmania», gånnå galggá liehket jåhtelamos mållaj. Væráldavuojtte «Spam» bådij gitta Vuollerijkas gilbbusav guossidittjat ja kommentieritjit. Navti besaj aj Hábmerav vuojnnet ållu buoremus láhkáj, gå viek tjáppa dálkke lij dán ájllega. Gilbbusa vuojtte sjattaj Rannus Kunto Ájluovtas, guhti l aj akta nuorajåvdåstiddjijs UNG AGE:an. 

– Dåbdduj buorre vuojttet, vájku iv lim heva buorep gå sij gej vuosstij spelliv. Lijma moattes sæmmi dásen, navti sjattaj geldulasj, giehttu ájluovtak. 

Duot dát dáhpádus

Dát ájllek sjattaj hávsske ij dåssju gilbbusa diehti, valla gå lidjin nav moadda ietjá sosiála dáhpádusá dagu paintball, bassæŋŋa, silent disco, rabás valástallamhuonaj ja nuorajklubba. Ålles dáhpádus lij nåvkå ja sihke idjadibme, biebmo ja bussa nuorajda lidjin nåvkå. 

– Suohttasamos ájllegijn lij galla vuojttet, valla aj biljardav ja pingpongav spellat iehtjam rádnaj siegen, javllá Kunto. 

Soapptsun

Oassálasste li ienemusát buorre ságajt giehttum maŋŋela ja nuora li soapptsum ja javllam sihti ienep dákkir ájllegijt.  

Kunto javllá maŋutjissaj jáhkká sjaddi moadda UNG AGE dáhpádusá Nordlándav miehtáj, vájku dal ij ållu diede goassa Ájluovtan vas sjaddá. Gå nav moattes lij oassálasstám ja nav buorre ságajt giehttum de dat vuoset dát la konsæppta mij sjaddá joarkket. 

– Buorre dåbddo lij galla, gå juojddá masi la russtim sjaddá bivnos. Dáhpádus lij viek geldulasj ja oahppam lav ålov ásadimes, låhpat vuojtte.