Dijmmá gulluj Knut Hamsun JS:ån lidjin viek nievres åhttsijlågo, sierraláhkáj bájke 10. klássagijs ettjin nav galles dåhku åtså. De sjattaj gatjálvis gåktu dilev rievddadit. Hábmera æládussiebre bæjválasj jådediddje Jørgen Jenssen miejnni ådå linnja máhttá liehket oassen tjoavddusis.

– Jus skåvllåj Elektro ja Dáhtáfágav oadtju, de fálaldahka viek vijddán. Dat sjaddá ávkken sihke bájke vidnudagájda ja Knut Hamsun JS:åj, subtsas Jenssen.

Vánesvuohta rekruttierimin

Barggo ådå linnjav åttjudit jåhtuj biejaduváj maŋŋela gå æládussiebrre vuojnoj bájkálasj industrijjavidnudagájn vájllu dákkir máhtudagá. Skåvlån ælla joarkkaåhpadusá ma vidnudagáj dárbojda hiehpi.

– Industrijjavidnudagá e besa bájke barggijt virggáj biedjat. Soabmása Stájgo modellav adni, valla dát fálaldahka l uddni vehi ráddjiduvvam, javllá Jenssen.

Merustaláduvvam lågo vuosedi boahtte guovte jahkáj galggi virggáj biedjat 170 ådå barggij fáhkabarggedásen, divna Hábmera vidnudagájn. Sierraláhkáj danen gå TQC ájggu viek vijdedit ietjasa dåjmajt åvddålijguovlluj.

– De luondulasj vidnudagá hæhttuji viehkev oadtjot barggijt åttjudittjat, ja dasi dát linnja máhttá viek viehkken, miejnni Jenssen.

Dijmásj giese ságastahttjájin Hábmera Æládussiebrre ja Knut Hamsun JS gåktu dáv tjuolmav aktan tjoavddet.

– Dágástalájma gåktu máhttep skåvlåv dahkat uksan máhtudahkaj bájke vidnudagájda, farra gå láhppet bájke nuorajt gudi stádajda jåhtåli, subtsas Jenssen.

Hábmera Æládussiebrre sihtá bájke nuora gudi sihti viddnofágalasj joarkkaåhpadusáv galggi bessat dasi.

– Jus galggap buktet linnjav ásadit de hæhttup barggat viek garrasit politihkalattjat váj fylkadigge vuojnná vidnudagá dárbahi bájke nuorajt ietjasa lusi åttjudit, subtsas Jenssen.

Vidnudagá aj dáv sihti

Basádismánon ja javllamánon åtsådij æládussiebrre makkir máhtudagájt dárbahi åvddålijguovlluj. Åtsådimen bådij åvddån 70 prosenta vidnudagájs ma åtsådibmáj lidjin vásstedam dárbahin elektro ja dáhtáteknologijja fágajt boahtte gålmå jagijda.

– Elektro ja dáhtáteknologijjalinnjan li viek moadda suore. Ietjá bágoj javladuvvam la dát viehka vijdes åhpadus. Dán linjan bæssá låhkåt elektrihkkárin, prosæssaoperaterran, mekanihkkárin ja moadda ietjá virgijda. Jáhkkep linnja máhttá gåbttjåt dajt stuorra dárbojt ma vidnudagájn li, javllá Jenssen.

Jenssen giehttu vijddásappot bájkálasj vidnudagá sihti aktan barggat váj linnja duohtan sjaddá. Ávttji aj juohkkahattjav vuojnosa sáddit Nordlánda fylkkasuohkanij. Jus dát la juoga massta berus.

Oajvvadusáj sváldas la: Innspillsportal - Nordland fylkeskommune (nfk.no)

Oavdos fálaldahka

Bájkálasj politihkkár Lars Filip Paulsen Hábmera Oalgesbelludagás la viek mielos oajvvadussaj.

– Oavdos la gå æládussiebrre oajvvat elektro ja dáhtáteknologijjalinnjav ásadit Knut Hamsun JS:åj. Jáhkáv dát máhttá liehket duodde juolgge skåvllåj boahtteájggáj ja ájn vil ájnnasabbo, vidnudagáj dárbojt ållidahttá. Duodaj dárbahip fáhkabarggijt mijá bájkálasj vidnudagájda. Jáhkáv aj bájke nuora guhkijt juo li dákkár fálaldagáv sávvam. Skåvlå udnásj fálaldahka ij la dågålasj, javllá Paulsen.

Dálátjij la dát dåssju oajvvadus æládussiebres, valla vuojnnet Hábmer viek dárbaj dáv fálaldagáv.

Jårggålam: Lars Th. Kintel