Hábmerin la juo nanos gamingbirás duola dagu oahpes SaltenLAN baktu, ja jus Arctic Gaming Experience-álgadiddje Eirik Holdal ja suohkana gamingbirrasa ájggomus duohtan sjaddá, de ásaduvvá Trackmaniagilpos Ájluovtan moarmesmáno 24. - 26. biejvijt.

– Guhkijt lip buorre ságajt gullam Hábmera suohkanis. Ienemusát nuorajs ja sijájs gudi SaltenLAN:ajn barggi.  Sæmmi båttå l midjij ájnas nuora e ietja galga prosjevtav ruhtadit, ja danen lip suohkanijn guládallam, álggá Eirik Holdal.

Holdal la læhkám Hábmera åvddånammadusán giehttomin UNG AGE dáhpádusá birra, man oajvveulmmejuogos li nuora 8. gitta 10. dássáj.

– Muv mielas lidjin politihkkára miellusa prosjæktaj. Danen sáddip formála åhtsåmusáv mav politihkkára galggi giehtadallat, valla ájggomus la dáv ásadit moarmesmáno 24.-26. biejvijt, javllá Holdal.

Låhpan subtsas Trackmania stuorru ja stuorru, sierraláhkáj maŋŋela gå gávnnuj Playstationin ja Xboxan jagen 2023.

– Spælla l juo værálda stuorámus bijllaspælla, valla ij la galla sæmmi stuorak dagu vuohtjemspela Fortnite, CSGO ja iehtjáda. Spælla l stuorámus Frankrijkan, ja de Tujskan ja USA:n, låhpat Eirik Holdal.

Åhtsåmusá milta galggi Drag Aktivitet ja Ájluovta nuorajklubba oadtjot niellja-vihtta gaming-masjijnajt maj ålles árvvo l 75 000-100 000 kråvnå jus suohkan dåjmav doarjju 100 000 kråvnåj.

– Dá nåvkå Drag Aktivitetaj vatteduvvi gijtton buorre aktisasjbargo åvdås ja gijtton bargo åvdås mav juogos dahká bájke nuoraj dáhpádusáj ásadimen. Dát la vejulasj Sparebank1 Nord-Norge Samfunnsløftet doarjjaga baktu, mav oadtjum lip ja mav vijddásappot sihtap vaddet, tjállá Holdal suohkanij.