Guollim ja bivddo la joarkkaskåvlå linnja gånnå oahppe álggi guovtijn jagijn skåvlån ja de li guokta jage nuoran viddnooahppen. Gå niellja jage li gållåm de bæssá guollár fáhkagirjev válldet. Magnus váldij guollár fáhkagirjev jagen 2021 maŋŋel gå lij Leknesan skåvlåv vádtsám. 21-jagák la agev lijkkum guollit.
– Mån lav agev læhkám stuorra ulmusj, danen sihtiv virgev gånnå besav iehtjam rubmahav adnet, váj diehkko ettjin dåssjåj dagáduvá, javllá Leivseth. Espen Fossvik vádtsá maŋemus jagev Myren, åvddål nuorráj galggá viddnooahppen. 19-jagák subtsas agev la lijkkum rubmahijn barggat ja virges berustam. – Áddjám la muv ednagav måvtåstuhttám, sån lij aj guolláj, duoddis Fossvik. Vájku báhtja lijga gárvedam, de lij ållo mij sunnuv alvaduhtij. Magnus subtsas dav mij suv ienemusát alvaduhtij bargo álgon, lij man jåhtelit rumáj hárjjánij bargatjit váni heva oademis guhkes ájggáj. Espen duoddis rubmahij lij låsep barggo gå majt lij vuorddám, valla ij val dan diehti vuollána. – Dábálattjat bargav skiftårnigin, barggap guhtta tijma, ja de li mujna guhtta tijma friddja. Ja de navti barggap gålmmå vahko jali ájn guhkep. Daj gudájn tijmajn galggá sihke bårråt ja gæhttjalit oadet nágin tijma, valla buoragit la dat mannam, javllá Leivseth.
Magnus fáhkagirjev váldij jagen 2021, valla ij la ájn stuoves bargov oadtjum. Nuorra guollár la farra læhkám moadda sadjásasj manojn moatten vantsan, gånnå nágin gaskav máhttá liehket viek ållo barggo, ja ietjá bále vas binnep barggo.
– Guhkemus majt lav barggam avtat rajes lij gålmmå máno. Iejvvi moadda ådå guollárijt, ja oahppá juojddá ådå juohkka biejve vantsan, javllá Magnus.
