–  Niehko mij mujna lij guhkijt juo læhkám, ålliduváj, niehko julevsámegielav gaskostit tjálalattjat. Almmudus la tsieggidum doajvo nali, valla aj duohtavuoda nali, mav muv mielas Harald Gaski nav buoragit gåvvit – Bágoj galggi suollaga ierit nággiduvvat.

Dav subtsas vuododiddje Vivian Aira Gásluovtas NuorttaSálto Avijssaj. Almmudagán la adræssa Bådådjon, ja namáv la snivva ájádallam. 

– Namájn sidáv Nálak fuolkkenamáv guddnedit, navti sjattaj Nálaga Tjállaga. Muv mielas la dát vuogas namma almmudahkaj, dat vuoset muv ruohtsajda ja akta muv berustimijs, girjálasjvuohta. Mujna l oajvvefáhka/master åbbålasj girjálasjvuodadiehtagin, ja lav åvddåla læhkám dåjmadiddje muhtem antologijjan sáme árvoj birra. Tjállám lav aj sáme mannogirjev.

Mánájda ja nuorajda

Almmudahka åvdemusát ásaduváj danen gå julevsámegiellaj ij gávnnu heva girjalasjvuohta mánájda ja nuorajda.

– Sáme máná, ja sierraláhkáj nuora, li almmudagá ulmmejuogos. Uddni gávnnu vehi girjálasjvuohta julevsámegiellaj ållu nuoramusájda ja ållessjattugijda, madi áldarjuohkusij “nuora” ij gávnnu heva girjálasjvuohta. Ulmme l aj sáme nuora galggi bessat låhkåt girjálasjvuodav massta berusti tiemáhtalattjat, ja mij låhkåmmielav, måvtåstuhttemav ja ávov buktá, tjielggi Aira.

Stuorra dárbbo

Duodden julevsámegielak girjálasjvuohtaj ájggu almmudahka almodit girjálasjvuodav mav julevsáme li tjállám.

– Ájggop almodit girjálasjvuodav juohkka sjáŋŋarin. Nágin almodusá sjaddi guovtegielaga, nágina dåssju julevsámegiellaj ja iehtjáda dávk dåssju dárogiellaj. Dáv árvustallá girjes nubbáj, dárbo ja márnána milta. Maŋŋela gå almmudagáv álgadiv, de li moaddása boahtám gatjádittjat girjjealmodimij birra, dát vuoset stuorra dárbbo l julevsámegielak girjálasjvuohtaj ja girjálasjvuohtaj mij la julevsámijs tjáleduvvam. Nágin prosjevtajt la almmudahka aj iesj álgadam. Almmudahka árvustallá aj digitála almodimijt, álkkes spelaj siegen, giellaåhpadibmáj, subtsas álgadiddje.

Almmudahka l ájn álgadime, ja gávnnum la dåssju nágin gallegasj máno, Aira milta.

– Ajtu l almmudagán juo aktijvuohta måttijn tjiehpes girjjetjállij, jårggåliddjij, tjuorggij ja viek tjiehpes gráffalasj hábbmijiddjijn Skrovas. Ietjá niehko, ja ihkap ulmme, la almmudagás viessot. Vuojnos dav, dálla prosjevtas prosjæktaj barggap mij aj edna ájgev válldá, låhpat Aira.

Jårggålam: Lars Th. Kintel