Ájllek moarmesmáno 24.-26. biejvij la dievva dáhpádusájs nuorajda. Sjaddá e-spårttå, silent disco, paintball ja volleybállo. Gåvvå: Sjermas:
Nuorajs nuorajda

Ásadi Arctic Gaming Ájluovtan vuostasj bále

Moarmesmáno 24-26. biejvij ásaduvvá ållu vuostasj UNG Arctic Gaming Experience Ájluovtan.


Dat la E-spårttå-dáhpádus mij galggá tjadnat arktalasj luondov «top-level» gamingijn. Sij gudi oassálassti bessi vuosedit man tjiehpe li e-spårtån, sæmmi båttå dagu bessi dav vásedit oavdos luondojn ietjas birra.

Akta sijájs gudi li vissjala dáhpádusájn la Rannus Kunto Ájluovtas. Kunto l oassen UNG Arctic Gaming Experiences Hábmera nuorajkomitiejas, mav li ásadam gávnatjit mav nuora sihti galggá dáhpáduvvat duon dán UNG AGE dáhpádusájn.

– Muv barggo komitiejan la åvdåstit nuorajt ja sijá sávadusájt, javllá Rannus NSA:aj.

Gilbos

Ásadime ájnnasamos dáhpádus la lávvodagá, gilbos e-spårtån Trackmania.

– Trackmania la bijllavuodjemspælla gånnå galggá liehket jåhtelamos mållaj. Konsæppta l álkke, valla ij la ber rijbbat. Gilbos la dan birra ahte galggá liehket tjiehpemus dan bivnos racingspelan, subtsas ájluovtak.

Gilbbusij boahtá aj dujska væráldavuojtte Tim Lunenburg guossaj, guhti ietjas gåhtjot Spam gaming-væráldin. Dujskak la Trackmaniav spellam alla dásen 2010 rájes, ja dálla Ájluoktaj boahtá.

– Návti bessap vuosedit Hábmerav ja dav tjáppa luondov ja kultuvrav mij miján la dáppe, sæmmi båttå dagu vaddep juojddá ådå sihke guossijda ja bájke ulmutjijda, duoddis Rannus.

Rannus Kunto la fáron Hábmera UNG Arctic Gaming Experience nuorajkomitiejan. Gåvvå: Stina Johnsen

Juohkkahattjaj

Vájku Trackmania-gilbos la ájnnasamos de li ietjá dáhpádusá ájllegav nalluj. Sjaddá silent disco, paintball, rabás valástallamhuonaj, bassæŋŋa ja ållo ienep. Diededibme dáhpádussaj rahpá gasskavahko moarmesmáno 22. biejve. Dáhpádus la nåvkå, ja bussa vuodji duoppet dáppet suohkanis Ájluoktaj. Bæssá aj idjadit jus sihtá. 

– Ij dárbaha divna dáhpádusájda oassálasstet, ásadibme galggá rádnastallamav ja hávsskes muossádimev buktet, danen bæssá válljit masi sihtá sæbrrat, subtsas Rannus. 

UNG AGE dáhpádus ij la dåssju Hábmera nuorajda, valla rabás la gájkajda. Idjadime ja iesj gilbbusa oassálasstema rádje álldara hárráj la 8. gitta 10. klássaj, valla nuora gitta 17 jagágijda li buorisboahtema dåjda ietjá dáhpádusájda.

– Viek oajvvadav juohkkahattjav UNG AGE:aj sebratjit. Dat la nåvkå dáhpádus suohtas ja moatte lágásj dáhpádusáj gånnå miján la juojddá fállat juohkkahattjaj. Ållu vuogas la jus sihtá ådå rádnajt, muossádimijt ja mujtojt oadtjot, låhpat Rannus.

Jårggålam: Lars Th. Kintel

Debatt
NordSalten Avis oppfordrer leserne til saklig debatt!
Tenk over hva man skriver og vis hensyn. Kommentarfeltet overvåkes av våre moderatorer. Grove overtredelser av normal debattskikk kan straffes med utestengelse.