Samojeda Teddy gal lijkku manádit. Bednaga æjgát la Ole Hay. Teddy, suv bena l vargga vidá jagák ja dán vahko l vas gålggåmin.

Árra ideda Teddy siejbev vuohttu ja rejdas la Gásluovtas mannat. Kloahkko 06.45 tjuodtju bena guovtij juolgij nanna stiruvsan ja gehtjat gáddáj gå vanntsa suojmma kájas luojttá. 

Teddy l aj ietjas oajvvesajev oadtjum, kaptejna buohta stiruvsan.

– Teddy lijkku ålggon liehket ja gierddá juohkka lágásj dálkijt nuoren. Vantsan soapptsu, gå ber muv siegen bæssá liehket de la dudálasj, javllá billetterra Ole Hay guhti Sortlátten årru, valla Gásluovtan årru bargadijn.

– Gå lip vuodjám Divtasvuonav birra, de Gásluoktaj boahtep vas vehi åvddåla kloahkko 11.00 juohkka biejve. De Teddy árvvet miján la nágin tijma båddå åvddål joarkkep. De jienajt dahká ja la viek ávon! Vádtsin dávk vihtta - guhtta kilomiehttara dan båttå bále, subtsas Ole Hay.

– Muv barggoturnus la gålmmå vahko bargon ja gålmmå vahko friddja, bena l ienemusát muv siegen læhkám maŋemus bielle jagev, valla gå áhkkám ij la idjabargon de la Teddy sijdan Sortlátten, tjielggi Ole.