2022 tjavtja nágin vissjalisá Ájluovta VS dahkin juojddá gå Ájluovta nuorajda vájlluji dáhpádusá. Dáv dahkin danen gå Ungdata åtsådime vuosedin Nuortta-Sálto nuora dåbddi aktu li. Suohkan aj vuorodij barggat aktuvuoda ja báhtsema vuosstij, ja navti oattjoj Ájluovta VS jådediddje aktan iehtjáda buorre ájálvisáv.
– Valástallamsiebren mierredijma hæhttup juojddá dahkat nuoraj åvdås váj oadtju birrasav ja sajev gånnå bessi valástallat, subtsas Lars Filip.
Bivnos fálaldahka nuoraj gaskan
Fálaldahka jåhtelit bivnoj Ájluovta nuoraj gaskan. Ålles 15 lidjin valástallamin gå NSA guossáj bådij.
– Dábálattjat li 10-15 nárre nuorajs juohkka hárjjidallamin. Dát la duodaj vuorbástuvvam ja dát la ihkap massta lav ienemusát mihá Ájluovta VS dåjmajs maŋemus jagijt. Tjielggasit vuohttuj nuora gudi e bállotjiektjamav jalik vuodjamav hárjjidalá dárbahin dákkir fálaldagáv, javllá Lars Filip.
Lars Filipa mielas ælla dåssju hárjjidallama rubbmelasj ávke ma li ájnnasa. Duodden la sjaddam sosiála sajádahkan mav Ájluovta nuora dárbahi.
– Hárjjidallamijn la viek sosiála birás gånnå hávsskudalli. Suohtastalli ja rubmahav aj hárjjidalli, goappátja li ájnnasa hælssuj. Rubbmelasj hárjjidallam sierraláhkáj nuorajda hieret varresvuoda vájvijt rubmahin ja mielan. Iehtjama mielas li miján læhkám dåssju buorre båhtusa, dættot Lars Filip.
Johnny Langmo lij fáron fálaldagáv álgadime jagen 2022. Gå hárjjánam la låggŋit, de la nuorajt viehkedam.
– Vuojnunagi li hávsskudallam. Gájbbedip ulmutjahtti ja iehtjádijt vieledi. Gáhttip aj ahte li tjiehpe rájatjit ietjasa maŋŋela, galggi liehket rádjánisá, duoddis Johnny.
Nuora viek soapptsu
Nuora Ingvald Jakobsen ja Dan Mario Kaino-Hestnes libá nuoraj gaskan gudi vissjalit hárjjidalli.
– Viek buorre l gå bessap vehi hárjjidallat mánnodagájt ja duorastagájt, subtsas Dan Mario.
– Buoremus hárjjidallamijn la gå gievrov, duoddis Ingvald.
Ælla dåssju báhtja gudi fálaldahkaj lijkkuji. Næjtso Julie Mølderup ja Nathalie Jessen libá aj viek hárjjidallam.
– Ållessjattuga li mijájt buoragit bagádallam ja gáhttiji ep juojddá boasstot dagá, subtsas Nathalie.
– Ja de l viek suohtas aktan hávsskudallat, duoddis Julie.
Ålles vehka giehttu åvddånam li ja åbbålattjat li viek dudálattja fálaldagájn. Valla Nathalie mielas lij akta vijor mij lij sierraláhkáj buorre fálaldagájn.
– Buoremus fálaldagájn la gå mij gudi ep la ájn ållim 16 jahkáj bessap hárjjidallat, danen gå ejma lam bessat ietján danen gå dåppe li njuolgadusá álldara hárráj, javllá Nathalie.
Lars Filipa mielas la fálaldahka nav buoragit doajmmam ahte alot Nuortta-Sálto ietjá valástallamsiebrijt muodugasj fálaldagájt ásadittjat bájke nuorajda.
– Dát fálaldahka l læhkám nav buorre nuorajda. Ájttsap dåbddi åvddåni, dáv duodaj alodav iehtjádijt aj dagátjit, låhpat Lars Filip.
Jårggålam: Lars Th. Kintel
