Stall Eivik dyreferie sujtto la vidnudahka mij la Hábmerin dåjmaduvvam måttijt jagijt juo. Andrine ja Svein Eivik álgijga stállasajijt lájggidit ja priváhta rijddimtijmajt fállat juo jagen 2006. Maŋŋela gå båndorsijdav åstijga Siljárbáhkon jagen 2008 libá hæsstavidnudagáv, judoshotellav ja stuorra låvdagoadev ásadam mij aneduvvá klássaladnjan ja bássan båndorsijda kursajda ja dåjmajda. Dálvveloabe dåjmajt la Nordlánda Fylkkasuohkan ruhtadam.
Biejvij nalluj li moatte lágásj dahkamusá ja dáhpádusá juohkkahattjaj. Oassálasstijda fáladuvvá duola degu hestajt gárvedit ja sujttit, rijddim sidjij gudi sihti, bednagij váttsatjit, låttijt biebmadit ja ásvas biebmo ja hávsskudallam dållågátten låvdagoaden -aktan julevsámegielav oahppat jali hárjjidallat. – Ihkap papegøye Pia jur duv nali sæjvvu! Hiebadip divna biejvijt dan milta galles båhti, man vuorrasa ja man ållo sámegielav buktu. Ij la aktak biejvve nuppe lágásj, valla viek fijna moatte láhkáj, subtsas Svein. Dán vahkon li moattes bargon båndorsijdan prosjevtan sámástime dáhpádusáj bále. Praktihkalasj giellakursaj li vihtta jage juo barggam, ja fáhkasuorgev ja metodihkav viek buoragit dåbddi. Sámedigge l læhkám sijá aktisasjbarggoguojmme giellaprosjevtajn. Dalloj sjaddá båndorsijdda ariednán gånnå sámás duon dán dáhpádusá bále stállan ja låvdagoaden. – Sij gudi e nav ålov åvdutjis buvte, ihkap nágin bágov ja gárgadisáv oahppi ja vehi gielav muossádi åvddål vas vuolggi -ihkap navti måvtåstuvvi julevsámegielav válljitjit vuodoskåvlån. Mav buoremusát lijkkuv metåvdåjn la gå ep ilá duolli gå nágin vehi boasstot javllá, farra dættodip dahkamusájt ja soapptsomav stállan, javllá Svein. Vahkko l plániduvvam mánnodahka l 1. gitta 4. dássáj, dijstagá unnemusájda 0-6 jage, ja gasskavahko ja duorastagá stuoráp mánájda/nuorajda. Dáhpádus la nåvkå, valla galggá val diededit åvddål bierjjedagá guovvamáno 23. biejve. Lijkkup juogadit båndorsijda rijbbamav ja ávov gájkaj gudi dav sávvi. Aktan hávsskudallat la suohttasamos! Dållågátten ságastallat, assten dahkat gulldalit ja sjermas bessat båttåtjav la mávsulasj, låhpat Andrine.
Jårggålam: Lars Th. Kintel
