Jørgen Jenssen jáhkká dáhpádus máhttá nuorajt suohkanij åttjudit. Gåvvå: Vuorkás.
Nuorajs nuorajda

Teknologijja baktu ájggu oadtjot nuorajt suohkanij årrutjit

Hábmera nuora bessi oahpástuvvat dan geldulasj teknologijjaj mij suohkanin aneduvvá.


Bårggemáno 7. gitta 9. biejve ásaduvvi teknobiejve vuostasj bále nuorajda Hábmerin. Hábmera Æládussiebre bæjválasj jådediddje Jørgen Jenssen sávvá dát dáhpádus vuorbástuvvá.

– Teknobiejve li gålmå bæjvvásasj dáhpádus dagáduvvam váj nuora ienebut oahppi ja dádjadi gåktu teknologijjav adnep Hábmerin. Sihtap vuosedit gåktu teknologijja aneduvvá virgijn ja makkir vejulasjvuoda danna gávnnuji. Mijá ulmme l vuosedit gávnnuji geldulasj bargo bájkálattjat, ja dárbahip boahtteájge máhtudagáv dáppe, javllá Jenssen NSA:aj.

Sihti bájke nuorajt barggen åttjudit

Váj galggi bájke nuorajt barggosajijda åttjudit suohkanin, de li bájke vidnudagá, Hábmera suohkan ja æládussiebrre aktan barggám. Aktan li dáhpádusáv dahkam mij dávk nuorat gæssá bargojda suohkanin.

– Teknobiejvij duogásj la æládussiebrre, Hábmera vidnudagáj siegen, sihti boahtteájge barggijt vuorodit. Sihtap nuorajda vuosedit dáppe Hábmerin gávnnuji geldulasj ja mávsulasj bargo sidjij gudi boahtteájge teknologijjajn sihti barggat. Konseptav lip hiebadam váj dat hiehpá Hábmera sierralágásj struktuvrraj ja æládusájda, váj oassálasste muossádi juojddá mij sidjij guosská ja mij sijájt arvusmahttá, giehttu Jenssen.

Majt bessi oassálasste muossádit?

– Ståhkama baktu teknologijjajn sihtap mijá ulmmáj ållit. Ep sidá dá galggi sjaddat skåvllåbiejve jali dábálasj guossidime vidnudagájda, ájnat galggi bessat oahpástuvvat divna dan geldulasj teknologijjaj mij aneduvvá mijá bájken. Oassálasste bessi fárruj drone girddemij, tjáhtjefámo buvtadimev åtsådit, álkkádusteknologijja barggomilluj, ja kvártsa rållav ådåájggásasj teknologijjan gehtjadit, diedet Jenssen.

Alot nuorajt diededittjat 

Teknobiejve li nuorajda gudi sihti ienebut oahppat boahtteájge barggosajij birra Hábmerin, jali gudi juo diehti sihti teknologijjajn barggat. Áldarjuogos la 13 jagágijs gitta 16 jagágijda.

– Návti nuora bessi teknologijjav gehtjadit suohtas ja interaktijva láhkáj, vájku dal man ålov åvdutjis máhtti, javllá Jenssen.

Teknobiejve li ålles Hábmera suohkanav miehtáj. Ásadiddje suvddemav organisieriji váj juohkkahasj bæssá iesjguhtik doajmmaj oassálasstet. Jenssena mielas la dát sierralágásj vejulasjvuohta ja alot nuorajt diededittjat.

– Dát máhttá sjaddat akta dajs ienemus geldulamos dáhpádusájt giese bále. Jus ienebut sidá diehtet, gehtja mijá Facebook-bielen jali jæsko Hábmera Æládussiebres. Hávsske ja geldulasj gal sjaddá, ja arvusmahtte vejulasjvuoda karriera hárráj. Ájnna majt dárbaha fárruj válldet la buorre mielav ja diehtemvájnogisvuodav, låhpat Jenssen.

Debatt
NordSalten Avis oppfordrer leserne til saklig debatt!
Tenk over hva man skriver og vis hensyn. Kommentarfeltet overvåkes av våre moderatorer. Grove overtredelser av normal debattskikk kan straffes med utestengelse.