Strávnjunje nuorajkluppav jådedi luojvoj bargge ja siján la stivrra niellja ållessjattugij ja guokta nuoraj. Organisasjåvnnå ásaduváj jagen 2011 - ja dallutjis la doajmmam.

– Ulmme kluppajn la bájke nuora galggi bessat asstoájggefálaldahkaj gárevselgaj dagi, gånnå æjvvali ja duov dáv aktan dahki, javllá jådediddje Tina Andersen.  

Kluppa huodnaha li Strávnjunje Nuorajvieson. Dåppe l siján klubbaladnja musihkajn/disco, bállotjiektjamspælla ja bievddetennis. Låptån bessi gæjmmit, filmajt gæhttjat ja budáldit. Bessi aj gymsálav adnet, volleybállov ja ietjá bállospårtåjt spelli. Dábálasj klubbaiehkedin li agev guokta ållessjattuga bargon, madi mánáj duogen la rádjat ja bassat åvddål stieggiji. Ietjá ásat klubba filmmaiehkedijt, málesti, halloweenfestav, juleball, ja akti jahkáj manni klubbamannuj stádaj. Klubba l jur spleisav tjadádam, oadtjun rudájt vehi inventárav ådåstuhtátjit, danen ájggu dal ruvva huodnahijt snivvit.  

– Mij stivran sihtap nuorajn galggá jasska sadje gånnå bessi æjvvalit, ja vuojnnep gasskadáse máná viek ávvusi gå bessi klubbaj fárruj! Sierraláhkáj ávvusav gå guosse dåjs ietjá bájkijs båhti. Diehki li gájka buorisboahtem, subtsas Andersen.

Ájnas nuorajt tjoahkkit 

Sunniva Lind Jakobsen Ájluovtas ja Sara Sund Horn Dirvegis li stuoves guosse Strávnjunje nuorajkluppan. 14-jagágij mielas la ájnas fálaldagájn gånnå nuora bessi æjvvalit ja hávsskudallat, ja ådå rádnajda oahpásmuvvat. Dáppe bessi skåvlå ålggolin æjvvalit, Sunniva javllá dáppe l ienep friddjavuohta. 

– Muv mielas la suohtas rádnaj siegen liehket, volleybállov spellat. Kluppan sebrudahtti, subtsas Jakobsen.  

Sara l akta nuorajs stivran ja suv duogen la giehttot majt nuora miejnniji ja sávvi.

– Sihtiv nuorajájras liehket danen gå sidáv nuorajt åvdedit, javllá Sara Horn.

Soapptsu 

Badjesijdan la nuorajklubba aj jådon. Suohkan dåjmat Høyborgen nuorajkluppav, ja sij uvsajt vas rahpin 2023 basádismánon. Dallutjis la læhkám klubba juohkka nuppát vahko. Kluppan gávnnu duola dagu dánssimguolbbe, biljard, airhockey, spela ja x-box. Nuora ietja mierredi majt sihti muhtem iehkeda dahkat, valla nuorajbargge l agev dåppe sijá siegen.  

– Nuora sihti ienep æjvvalimsajijt ja asstoájggefálaldagájt. Oahppe gudi e nav moadda rádnajt iejvvi skåvlå maŋŋela bessi iehtjádij siegen liehket dálla, javllá jådediddje Gerda Jaanus.

Jaanus subtsas dálátjij li nuora soapptsum. Rádudallam la sihke nuorajrádijn ja oahppij majt dal ájn sihti, ja gåktu fálaldagáv máhttá dahkat nav buoragin gå ber máhttelis. Maŋenagi galggi åttjudit stivrav nuoraj gudi válldi ienep åvdåsvásstádusáv ja ietja duov dáv dáhpádusáv hihttiji. Jaanus javllá nuora li juo oajvvadusájt buktám majt sihti dahkat. Nuora li ájnnasabmusa, valla maŋenagi ájggu gæhttjalit gasskadássáj aj dáhpádusájt fállat. 

– Ep dáv dagá danen gå edna nuora galggi båhtalit juohkka bále, farra sihtap sij gudi dav dárbahi galggi diehki boahtet, låhpat Jaanus.

Nágin ájge duogen de rahpá nuorajklubba Ájluovtan aj. Dav aj galggá suohkan dåjmadit, Drag Aktivitet galggá viehkken. Klubba galggá ienebut E-spårtåv vuorodit, valla oasstám li ietjá diŋgajt aj. Gå Ájluovta klubba rahpá, de galggá klubba juohkka nuppát vahko Badjesijdan ja Ájluovtan. Kluppajn galggá goabbák fokus váj sjaddá suohtas goappátjijt guossidit. Galggá aj gæhttjalit hiebadit Strávnjunje nuorajkluppa biejvij.  
 
Strávnjunje nuorajklubba l rabás juohkkahattjaj ålles suohkanis 5.-10- klássan. Sij uvsajt rahpi párratálla vahkoj duorastagájt kl. 1830 rájes gitta 2130. 5.klássa bæssá dåppe liehket gitta kl. 20.00.

Høyborgen Ungdomsklubb Badjesijdan la rabás juohkka nuppát vahko - dábálattjat gasskavahkojt kl. 16-21. Dat la rabás 8. klássagij rájes aktan joarkkaskåvlå oahppijda.  

Ájluovta nuorajklubba rahpá gidá nalluj.

Jårggålam: Lars Th. Kintel