Javllaloahpe l lahkanahttjámin, valla vuostatjin la dat giehtos eksábmaájgge ja guhka biejve låhkåmlanján. Soabmása li dávk læhkám smidá ja barggam tjavtjav tjadá, madi iehtjáda galggi ednagav oahppat oanegis ájgen. NSA la gatjádam nieljet studentajs Hábmerin gudi duoppen dáppen lándav miehtáj studieriji jus siján li buorre oajvvadusá gåktu eksábmaájge tjadá rijbbat.
Karl Eidsvik Solvang boahtá Badjesijdas, ja válldá Stáhtadieda bachelorgrádav Norges teknisk-naturvitenskapelige universitiehtan (NTNU) Roandemin. 22-jagák javllá studenta bierriji vuostatjin ájádallat makkir hábme l eksáman, gå da li nav moattelágátja. Solvanga oajvvadus la buojkuldagájt ålgolt oahppat jus dujna l eksábma gånnå besa válljit moadda vejulasjvuodaj gaskan jali jus danna li dåssju nágin gallegasj gatjálvisá. Jus la njálmálasj eksábma de lisj dávk sluogas guodet mánusav, váj vuojnná mav duodaj mujttá. Jus la eksábma viehkkenævoj, de lij 22-jagák dahkat tjállusav pensuma ájnnasamos ássjij váj dat la gárves, ja navti ij dárbaha iesj eksáma bále åhtsågoahtet. Valla ij galga vajálduhttet ietjas huksat bargadijn. – Válde båttåjt, liege rádnaj ja familja siegen, maná ålgus biejvvetjuovggan váttsatjime! Eksámaj bále l álu råhtto, danen la ájnas muhttijn vuojŋadasstet, subtsas Karl. Jersey Prue Hansen studieri Siviløkonåvmmåj Nuortta universitiehtan Bådådjon ja subtsas iehtjádij siegen hárjjidallat la viehkken. Vuogas la iehtjádij ságastallat dan tiemá birra mij diján la -navti lihpit nubbe nubbáj viehkken dádjadittjat, sæmmi båttå gå tjielggidijn iesj buorebut åhpa pensumav. – Ájnas la balánsav gávnnat eksábmalåhkusij ja ietjá dáhpádusáj gaskan iellemin, dættot Hansen.Alármma ålgolt åhpatjit ja båttåjda
Caroline Solhaug Prestøy studieri visuála dájddagav ja gaskostimev Agdera Universitiehtan (UiA) Kristiansandan. 21-jagák oajvvat alármav biedjat telefåvnnåj gå barggá. Iesj dåbmarit barggá 30 minuhta -dan maŋŋela 10 minuhta båddå. Návti gærddot desik ålli. Dán láhkáj miejnni Prestøy sjaddá måvtugap bargatjit, ja dåbddu álkkebun. Prestøy dættot aj ájnas la båttåjt válldet. – Maná váttsatjime, de oajvve jierit. Ij dárbaha liehket guhka tuvrra, varres ilmme l vuogas vájku l ber binná, javllá Caroline. Åsta Solvang válldá Råmså universitiehta psykologijja profesjåvnnåoahpov, ja sujna li guokta buorre oajvvadusá mij guosská gåktu eksábmaj låhkåt. Vuostasj la guojmmeoahppij siegen ságastallat juohkusijn gånnå vásádusájt juogat, hárjjidallá gaskostit mav låhkåm la ja ájttsá man birra bierri ienebut låhkåt. 20-jagák dættot aj dát la buorre danen gå sæmmi båttå hávsskudallá. Nubbe oajvvadus la dahkat juojddá ållu ietján, buoremus iehtjádij siegen.
Jårggålam: Lars Th. Kintel
