Mav suohkanstivrra galggá giehtadallat gasskavahko biehtsemáno 19. biejve boahtá åvddån suohkan ij rádnáj gujddimusájda gulldala. Sij li gujddim gå TQC sihtá unnin rievddadit ietjasa plánajt ådå vedja hárráj sijá ådå industrijjakádjaj. TQC sihtá ietjas vedjav unnin rievddadit váj Stáhta Gæjnnodåjmadagá nårmajt ållidi. 

Rádná gudi plániduvvam Revskjæret vedja rastá årru miejnniji dát sjaddá nievres láhkáj vájkkudit sijá lahka birrasij ja årromdilláj.

Suohkan vas ietjas bieles argumentieriji jåhtulahka gådij vuollelin ij heva lassána ietján gå biggima bále. Gå gárves la de sjaddá vehi jåhtulahka guossijs kultuvrramujttuj. Dát væddja galggá liehket hiehtevæddja ja dåppe ij galga heva låsep jåhtulahka. Vedjan galggá bajusj man tjadá tjáhtje gålggå ja danen sjattasj dávk binnep juhtsa gå jus lij dábálasj bajusj.

Jåhtulagá sihkarvuohta buoreduvvá

Vijddásappot tjálli jåhtulagá sihkarvuohta buorrán gå Ájlátte vedja milta biggiji rahteváttsáldagáv, dát le aj udnásj diles buorep. Ájggu gæhttjalit bisodit biehtsevuovdev gådij vuollelin.

Suohkan tjállá gujddimus ij ássjáj buvte makkirak ådå diedojt, ja danen gujddimusáv hilggu juohkka láhkáj.

Vijddásappot boahtá åvddån gujddimus Stáhtaháldadiddjáj sáddiduvvá.

– Suohkan guorras háldadusoajve árvustallamij gåktu ássjen åvddån boahtá ja miejnni gujddimusáv galggá hilggot.

Háldadusoajvve oajvvat TQC:a oajvvaduvvam rievddadus ij la loabálasj åvddål ájggemierre gujddit la vássám, jali gå gujddimus mærrádussaj la vijmak mierreduvvam.