Jagev birra bæssá Trádná oavdos dájddapárkav niektit. Giesen li duodden bávtij siejnijn mállaga dåbdos dájddárijs.

Valla da 17 statuvá ma li stuovvása párkan, dárbahi diedon soames dajt muhttijn skuorrol.

Danen suohkanis doajmmarudájt åhtsi juohkka jage, ja Kunstparkena jådediddje Fred Eddy Dahlberg, subtsas li nágin vidjura maj kvalitiehtav hæhttuji bærrájgæhttjat. 

– Dálke ja biekka, juohkka diŋŋga l ham ålggon. Gidáj galggap divna gehtjadit, subtsas Fred Eddy NuorttaSálto Avijssaj. 

Sierraláhkáj lij akta skulptuvrajs ájádusájn gå dájddapárkka åtsåj rudájt ájmon anedittjat dán jage.

– Dat la skulptuvrra mij la viek sierralágásj - parkerimgalbba rámbuvda guovlluj. Dát lij aktisasjbarggo Kunstparkena ja Nordlánda fylkkasuohkana gaskan, «Kunstneriske forstyrrelser». Ep ållu diede majt åvdåbielijn galggap dahkat, dav hæhttup dávk spesiálarámbuvddaj doalvvot. Dát lij gåjt mijá ájggomus gå rudájt åtsåjma, låhpat Dahlberg.

Jårggålam: Lars Th. Kintel