Ælla dudálattja huodnahij
Vidát jage juo dálla li Salten-Lan ásadiddje vehka buktám viek vuorbástuvvam dáhpádusáv ásadit. Dán bále lij ållu dievva. Báhtjaj mielas ælla huodnaha Ájluovtan dågålattja, ja gatjádalli manen la návti. Akta sijájs guhti lanav ásat la Benjamin Bordevik, ja sujna lidjin nágin ájádusá majt NuorttaSálto Avijsajn juogadij.
– Huodnaha Ájluovtan li bátsádallam jus buohtastahttá mijá ráddnábájkátjij dagu Allhuset Stájgon ja Hamarøyhallen Badjesijdan, javllá Benjamin.
Benjamin duoddis gå álmmuklåhko Ájluovtan galggá sjaddat, de sávvá dát rahpá Hábmera suohkana politihkkárij tjalmijt. Gætját moaddása li dálla gallánam vuorddemis moatte dåjmaj hállav man birra l læhkám sáhka moadda jage juo.
– Ájluokta l sjaddamin, ja luluj vuogas moatte dåjmaj hállajn. Sihke valástallamij ja dáhpádusájda dagu dáv mav uddni lip ásadam, duoddis.
Lan lij hávsske
Benjamin nammat lana vuorbástuváj dán jage aj. Edna dáhpáduváj ållo suohttasij ájllegav tjadá.
– Galggap spellat, hávsskudallat ja suohtastallat. Lidjin aj gilpustallama spelajn dagu Fortnite ja EAFC 24. Galggap aj suohttasijt hihttit ma ælla spellamij tjanáduvvam. Dát dáhpádus ij la dåssju sidjij gudi berusti «gamingis», valla aj sidjij gudi dåssju sihti hávsskudallat ja suohtastallat, tjielggi Benjamin.
Moadda máno plánima maŋŋela lidjin báhtja dudálattja. Valla russtijin galla ålov dáhpádussaj.
– Moadda máno lana åvddåla lip barggam sponsåvråj, almma internehta, ja huodnahij åttjudimijn. Ja de lij rudájt háldadit ja vijmak bærrájgæhttjat ahte lana sisadno lij buorre, váj divna guosse galggin soapptsot, javllá Benjamin.
Dudálasj guosse
Gå huonaj lij ållu dievva dudálasj guossij, de NSA guoktásij ságastij gåktu lijga Salten-Lanan soapptsum. 18-jagága Emil Mikkelsen ja Lukas Sjo vuojnunagi soaptsojga dán jagásj Lanan.
– Udnásj pládna l EAFC gilpustallamij sæbrrat ja buorre rádnaj hávsskudallat, subtsas Emil.
– Maŋemus jagijt lav moaddi læhkám lanan, ja soapptsum lav juohkka bále, duoddis Lukas.
Javllaba viek gijttogisá libá gå soames vissjá ásadit dákkir dáhpádusájt. Báhtja miejnniba boahtte jahkáj vas máhttsat.
