Frisbeegolf, mij la aj oahpes discgolf namájn, la valástallam mij la dábálasj golfa muodok, valla farra gå slubbo ja bállo, de valástalle adni skierrojt/frisbee. Ulmme l skierrov álgos luosadit kårja sisi nav binná luosadimij gå ber máhttá. Bánan li moadda rájge, ja juohkka rájgen la álggosadje ja koarjja mav galggá dæjvvat.

Frisbeegolfa vájmmelis Johnny Langmo miejnni valástallam la nav bivnnum danen gå danna li nav moadda buore biele.

–  Jáhkáv nav bivnos la danen gå suohtas la, hiehpá gájkajda, viek hávsske l, i dárbaha viek buorre fårman liehket ja ij la ga divras, subtsas Langmo.

Bivnos valástallam

Danen gå dát valástallam nav bivnnum la, de li aj ánodam bánav guhkedit. Ieme bádna ij la ållu buoremus sajen tjuodtjum iehtjádij hárráj gudi doajmmapárkan li ietjá måhken, danen gå kårja væddjabællán lidjin.

– Bádna lij ilá oadne, ja ánodin guhkep, buorep ja jasskadap bánav gånnå bessin spellat. Lip aj kårjajt væddjabællás ierit sirddám váj juohkkahattjaj sjaddá jaskadabbo.

Frisbeegolfbádna ájggá juo tsieggiduváj danen lij dal muddo ådåstuhttet. Åvddåla lidjin bánan guhtta kårja, ma de sjaddin 12 jus ruopptot aj spelaj.

– Dálla li miján aktse kårja, valla ruopptot aj spellap, danen li bánan 18 rájge tjoahkkáj. Bádna l aj guhkep dálla, navti adnep viek stuoráp oasev párkas, luondos ja tjuojggamláhttos gå åvddåla, duoddis Langmo.

Miehttsit ja kårjajt ådå sajijda biedjat li dugnadin dahkam, nágina sijájs gudi ienemusát berusti li æjvvalam dáv oarnnitjit. Ådå kårjajt la Ájluovta VS ruhtadam.

– Åhtsåm lip ruhtadiddjijt, valla dálátjij la valástallamsiebrre máksám gålmmå kårja. Sjárav lip aj Jessen Røras oadtjum, ja dassta de gijttep, låhpat Langmo.