Hábmera næjttso Josefine Aasjord la agev læhkám sjuggel, ja aktelt duov dáv hihtti asstoájggedoajmman. Dálla vuobddá buktagijt majt iesj la dahkam, bielljehervaj rájes gitta poasstakårtåjda.
– Muhttijn måttijt tijmajt smáv duojij budáldav, javllá Josefine. Mánná rájes juo la Josefine læhkám sjuggel, ja agev ávvudaláj dájdda- ja giehtabarggotijmajda, ja bæssásj- ja javllagiehtabargojda.Ienep oasste
Tjavtja 2021 rájes Josefine ietjas asstoájggedåjmav ienep barggon dagáj. 21-jagák subtsas álgos ij lim ber diehtet gåggu jali gåktu galgaj álgget, valla dálla dåbddo sujna l kontrålla. Dálla ietjas buktagijt Etsyn vuobddá, ja gå moadda bájkálattja dav ánodin, de la sujna aj Facebook-bielle dálla. – Dálla dåbdåv dájna rijbadav, ja sávav máhttá ájn vehi stuorrot maŋenagi, subtsas 21-jagák.
Válldá ájgev
Buktagijt ij la ber ijá badjel dahkat, ållo galggá sadjásis. Edna ájgge manná buktagij ja materiálaj diŋŋgomij. Dan maŋŋela hæhttu gávnnat ma buoremusát aktij hiehpi. Ja gå buktaga li gárvvása de la ájn edna prosessas báhtsám. Buktaga galggi næhttaj, ja váj galggi nav bivnnusa gå ber vejulasj de galggá motijvva rádjánis ja tjuovga sinna. Duodden galggá gåvåjn buorre desájnna. De esski máhttá álgadiddje ietjas buktagijt næhttabájkijda biedjat.Niegat asstoájggedåjmastis viessot
Josefine Aasjord la bajássjaddam ja årru Strávnjunjen. Bæjválattjat barggá 21-jagák Responssenter ja sentralbord operatørran HT-Safe AS:an Badjesijdan. Dálla subtsas sujna l agev læhkám niehko rámbuvdav rahpat ja ietjas vidnudagáv álgadit, valla dálla álgon gåjt dåssju ietjas buktagijt nehtan vuobddá. – Dagu juo lav giehttum, de la muv niehko dássta viessot ålles ájgen, dav vuordedijn de lav dåssju dáj sajijn dagu Etsy, Facebook ja duolloj dálloj iesj vuobdáv fusalattjat. Diŋŋgomijt gurppit ja sáddit la ihkap suohttasamos mav diedáv, låhpat Josefine Aasjord.