Girjen Hábmera suohkanij mav Salten Brann bæjválasj jådediddje Per Gunnar Pedersen tjálij javllamáno 22. biejve dijmmá, oajvvaduvvá Stuorgiette stasjåvnnå hiejteduvvá, ja bijlla Ájluovta stasjåvnnåj jådeduvvá. 
– De dát stasjåvnnå sjaddá guovte gierde nannusabbo guovtijn sæmmi lágásj bijlajn. Stuorgiette guovlo åvdås vásstedi Badjesijda bargge dagu ådå årnigin mierredum, konkludieri Pedersen. 
Dát dáhpáduvvá danen gå Salten Brann ájtsaj hásstalusájt barggijt åttjudit Stuorgiette stasjåvnnåj. 

E nagá barggijt åttjudit

Salten Brann váldij badjel åvdåsvásstádusáv Stuorgiette stasjåvnå åvdås jagen 2020. Dalloj dåppe bargajga guovtes. Árvustallin lasedit barggovegav gålmmåsij, valla dallusj bargge javllin ij lim ber barggijt åttjudit bájken. 
Akta barggijs pensjåvnnåj manáj javllamáno 31. biejve 2020, ja dallutjis la dåppe læhkám ber akta bargge, ja girjes åvddån boahtá sån ij asta jali sunji ij hieba hárjjidallat.
– Jåhtuj biedjam lip bargo låhpadimev, tjállá Pedersen.

Oajvvat hiejtedit

Salten Branna oajvvadusán ådå buollemårnigij Hábmerin oajvvadi Stuorgiette stasjåvnnå hiejteduvvá. Ådå buollemårnik la maŋŋunam gå Hábmera suohkanstivrra mierredij javllamáno 16. biejve jåhtuj biedjat guoradallambargov ådå buollemårniga ásadime aktijvuodan. Bargguj li juollodam 150 000 kråvnå vejulasjvuodaj guoradallamij ja åvddåprosjæktaj man milta de galggi investierimijt mierredit. 
– Gå dal ådå buollemårnik la maŋŋunam de ij la åvdep buollemårnik dågålasj. Ij la jiermálasj barggijt åttjudit ja åhpadahttját Stuorgietten jus ajtu la stasjåvnåv plánim hiejtedit. 

Jårggålam: Lars Th. Kintel