Jårggålam: Lars Th. Kintel

Prosjækta Sáme máná ådå sebrudaklanján (Sámos) le vidá jage juo gæhttjalam rievddadit sáme mánájgárddestruktuvrav váj sáme filosofijjav ja árbbediedov tjuovvu. Pilotmánájgárde iesjgeŋga sáme guovlos válljiduvvin hábbmitjit sáme mánájgárde boahtteájgev. Åvdep mánájgárdde Vuonak mánájåroj lij akta nieljet mánájgárdijs ma válljiduvvin gæhttjalimprosjæktaj oassálastátjit.

Vuonak mánájårruha konkursa maŋŋela oattjoj ådå mánájgárdde Viejega sajev prosjevtan. Snjuktjamáno gassko ásadin Sámos Sáme Allaskåvlå siegen maŋemus konferánsav Guovddagæjnon gånnå prosjevta båhtusa ja åtsådallama åvddån buvteduvvin. 

Buorre aktisasjbarggo

Viejega bargge li oassálasstám oahppotjåhkanimijda, juogoságastallamijt tjadádam ja mánájgárden li guosse læhkám. Dutkamájggudagá bále åtsådallin ahte oadtjun buorre aktijvuodav mánáj ja dutke sjaddin avta láhkáj dagu akta sijájs gå lidjin dáppe guossen. 

– Miján le læhkám viehka buorre aktisasjbarggo sijáj. Mij lip oahppotjåhkanimijda sæbrram, ja dutke li mijá guossen mannam. Muhttijn la læhkám vehi hásstalus korona diehti gå guhkes ájggáj ejma besa æjvvalit. Vájku lidjin dal hásstalusá, de la buoragit doajmmam, miejnni pedagogihkalasj jådediddje, Charlotte Paulsen.

– Sjaddam lip ienep diedulattja metodihka ja pedagogihka gáktuj ja oadtjum åvddånahtte mánájgárdev gånnå divna barggi sæmmi ulmij vuoksjuj. Garrasit lip barggam jåvsådittjat dåhku gåggu dálla lip jåvsådam, tjielggi bæjválasj jådediddje, Mary Knutsen.  

Aktelasj barggo 

– De la ham nav ahte vájku li vuoge majt mánájgárden ja sámegielak mánájgárddefálaldagán adnep, de ep máhte vuojŋadallat ja usjudallat lip iehtjama bargov dahkam. Hæhttu agev gielajn garrasit barggat. Máná galggi ietjasa gielav åvddånahttet gielladile milta, miejnni Paulsen. 

Konkurssa hásstalusájt buvtij

Dijmásj biehtsemáno låhpan, gå prosjækta galgaj ålliduvvat, de åvdep mánájgárdde Vuonak Mánájåroj konkursav åtsådij.

 – Gijtto gå oattjojma dijájt iejvvit. Boados dát bargos mav dij mánájgárden dahkabihtit, le ahte dijá mánájgárdde l akta dajs buoremusájs Sámen, javlaj prosjæktabargge Anne Jannok Eira maŋŋel gå mánájgárdev dijmmá guossidij. 
Prosjæktajådediddje Ol Johan Sikku juorrulij avta gaskav gåktu åtsådimprosjækta massta lidjin oassen galgaj åvddånit. Dan diehti lidjin viek ávon gå Viejega máhtij prosjevtajn joarkket.

– Dajnas gå ådåsis vat álggin daj sæmmi barggij ja sæmmi mánáj. Ja lidjin læhkám fáron åvddånimen, sihke kursaj ja dutkamprosjevtaj baktu ma li pilotmánájgárdijt tjuovvum. Siján lij nav alla kvalitiehtta pedagogihkalasj bargon ja giellabargon, ja dan diehti lij ájnas sijájt oadtjot fárruj vijddábut, låhpat Ol Johan Sikku.