Rock mot Rus la festiválla gárevselgaj dagi, danen la dat akta gallegasj festiválajs mij la nuorajda vuollel 18 jage. Rock mot Rus ásaduváj vuostasj bále jagen 1983, ja dallutjis la ásaduvvam juohkka pálmmaájllega, ja navti l dat akta lánda vuorrasamos ja stuorámus nuorajfestiválajs.
Dáppe bæssá ietjas juohkusav diededit rockemønstringij, jali máhttá boahtet juohkusijt gulldalittjat, dán jage båhti duola dagu RSP & Thomax ja Skaar. Maŋŋet bierjjedagá la rockemønstring, gånnå amás juohkusa ja artista bessi nágin lávllaga guhtik tjuojadit, ja vuojtte almoduvvá maŋep ijá ja rudájt vuojtti. Nágina juohkusijs ma tjuojadin «amaterran» sienan Andenesan åvddåla dåbddusin sjaddin li duola dagu Kråkesølv, Tungtvann ja Sivert Høyem. Dijmmá mannin 23 nuora Hábmeris Andenesaj Stájgo nuoraj siegen, ja gå nav hávsskudallin de mierredin dábijn joarkket. Prosjevta «Hamarøy og Steigen blir bestevenner» baktu nuora oahpásmuvvi suohkanrájáj rastá, ja dán jage lidjin moattes gudi fálaldagáv ánodin goappátjijs suohkanijs. Suohkana suvddemav máksi, ja sihke nuorajskåvlås ja joarkkaskåvlås Hábmeris ja Stájgos li oahppe gudi dán jage vuolggi, valla ij val aktak galga tjuojadit dán bále. NSA la gatjádam Mathilde Mortensenis, guhti l Barnevænnlig punkjuohkusa vokalissta mij vuojtij Rockemønstringen 2022 majt sån ájádallá festivála birra. Dán jage vuolggá 19-jagák nælját bále Rock mot Rusaj. – Buoremus festiválajn la gå iejvvi nav edna ludtjusasj kula musihkkárijt ja nuorajt gudi gillu, ja berusti sæmmi ássjijs gå dån iesj, javllá vokalissta. Maŋŋela gå Barnevænnlig vuojttin Rockemønstringen jagen 2022 de sidjij moadda uvsa rahpasin. Oadtjun edna promosjåvnåv bájkálasj avijsajn, ja duodden ållo berustimev nuorttan Festival Norge bookim vegas. Vuojtto lij 20 000 kråvnå, mav juogos anij ietjas vuostasj skierrov bádditjit. Dan maŋŋela li tjuojadam sihke Parkenin ja Buktafestiválan. Oahpes namáv li oadtjum, ja tjuojadam li moatten konsertan ålles Vuonarijkav miehtáj. – Dát la ihkap Vuona stuorámus rabás pårttå stuoráp værmádahkaj musihkka-Vuonan, låhpat Mortensen.Jårggålam: Lars Th. Kintel
