Sissel Mikkelsen ja Jørn-Robert Knutsen libá goappátja jur álggám Árranij. Mikkelsen álggá dávvervuorkkájådediddjen, madi Knutsen la giellarádevadden virggáj biejadum. (Gåvvå: priváhta)

Sissel ja Jørn-Robert ådå hásstalusájda ávvudallaba

Árran julevsáme guovdásj álggá ådå jagev guovtijn ådå barggijn.


Sissel Mikkelsen ja Jørn-Robert Knutsen libá goappátja jur álggám Árranij. Mikkelsen álggá dávvervuorkkájådediddjen, madi Knutsen la giellarádevadden virggáj biejadum. 

Mikkelsen la álgo rájes Sørkijlas, valla årru Ájluovtan. Sån boahtá njuolgga bargos Sámedikke kultuvrraåssudagá seniorrádevadden, ja la åvddåla barggam kultuvrraráde dávvervuorkkáåssudagán. Sån ávvudallá ådå barggoárggabæjvváj.

- Dát la muv suorgen, valla dálla lav bievde dån nuppe bielen, javllá ådå dávvervuorkkájådediddje.

Viek geldulasj

Sån gåvvit ietjas ådå bargov moattebelagin.

- Viek geldulasj la. Dáppe galgav Árrana dávvervuorkkábargov jådedit. Dat merkaj jådedit barggijt ja prosjevtajt dávvervuorkkásuorgen, tjielggi Mikkelsen. Nammat Árrana ådå dájddamagasijnav, Hans Ragnar Mathisena vuosádusáv, aktan Bååstede prosjevtav ållit. Bååstede prosjevta ulmme l ruopptot doalvvot sáme dávverijt Norsk Folkemuseumis ja Kulturhistorisk museumis gudá sáme dávvervuorkájda. 

Duoddis sån la viek dudálasj gå la oassen Árrana barggovegas. 

- Mån lav viek dudálasj. Dáppe li viek moadda tjiehpes bargge, ja sjaddá aj geldulasj gåktu máhttep guovlo ietjá dávvervuorkáj ja ásadusáj siegen barggat, ja dåj vidá ietjá sáme dávvervuorkáj.

Árrana ådå dájddamagasijnna. Gåvvå: Martin Rimpi.

Ådå hásstalusá

Árrana ådå giellarádevadde, Jørn-Robert Knutsen, la maŋemus gáktsa jagijt luosajt biebmadam, sån la låhkåm luossabiebbmamav ja jådedimev Nuortta Universitiehtan, ja la aj Árrana mánájgárden barggam. Sån la måvtuk ådå barggoárggabæjvváj ådå hásstalusáj.

- Viek buorre l giellaj, ja sæmmi bále de oattjov ådå barggobirrasav ja ienep ájgev familja siegen, javllá Knutsen. 

Ådå bargon galggá aktij måsskit giellaprosjevtajt, giellaarienájt ja julevsáme jårggålimijt. 

- Jus gallegasj bágoj galgav tjielggit de la muv barggo giellaguovdátja dåjmajt tjadádit, giellakursajt ásadit ja tjadádit, vehi sáme girjálasjvuodav almodit aktan åtsålvisá, rappårtå ja jårggålime. 

Måvtuk

Knutsen giehttu suv li buoragit vuosstáj válldám ja ávvudallá gielajn barggát. 

- Dåbddu riekta, ja muv li buoragit vuosstáj válldám. Sjattasj má buorre dal dát, ja måvtuk ja rejdas lav gielajn barggagoadátjit, låhpat.