Hábmera girkko l 50 jage vuoras, Rivtakvuona girkko 250 jage vuoras, ja Hierenjárga girkko ålles 300 jage vuoras.

Árvulasj girkkotsiekkadusájt ávvudalli

Hábmera girkko li guhkijt læhkám ájnas æjvvalimsadjen iellema ájnas dáhpádusájda, gástas hejajda ja hávddádimijda, duodden javlla- ja bæssásjávvudallamijda ja konsertajda. Girkko li bájkálasj sebrudagájda viek ájnnasa, ja ávvudallamájllega bále bessi viesáda vuosedit gijttevattja li dáj tsiekkadusáj åvdås ja majt da ájn sebrudahkaj merkahi.

– Jur danen gå nav moaddása li nav ávon girkkojisá, danen gå dajda ávujn ja surgujn tjágŋá, de bæssá álmmuk návti vuosedit man ávon ja gijttevattja li, sihke dassta ma girkko li læhkám, valla aj dan åvdås ma ájn li ja galggi liehket boahtte ájgijda, stáddán ja æjvvalimsadjen, tjállá Divtasvuona ja Hábmera tjoaggulvisráde.

Ájllega prográmma

Ávvudallamájllek álggá bierjjedagá basádismáno 8. biejve Hierenjárga girkkon konsertajn "Tre trubadurer og en prest". Lávvodagá basádismáno 9. biejve l dáhpádus "Hamarøy kirke – min kirke!" Hábmera girkkon, gånnå moadda bájkálasj viesáda oassálassti nágin ságastallamij dan birra man ájnas girkko l sebrudahkaj, ja duola dagu Hamarøy barnekor lávllu. Sådnåbiejve låhpaduvvá ávvudallam ávvojubmeldievnastusájn Rivtakvuona girkkon, gånnå ájggu maŋus gehtjadit ja gånnå aj girkkokáfav jubmeldievnastusá maŋŋela guossodi.