Jårggålam: Lars Th. Kintel

Rádna Marlene Ellingsena siegen libá gåhtjoduvvam tjuolldemæjvvalibmáj basádismáno álgon Evenskjeran. Dåppelt vat lahkke sijájs válljiduvvi Sámev åvdåstittjat Alaskan. 

Arctic Winter Games la álggoálmmugij valástallamgilpos. Ásaduvvá juohkka nuppát jage nuorajda. 

Suohtas bessat gæhttjalit

Næjtso reflektieriba vehi dan birra gå libá æjvvalibmáj gåhtjoduvvam, ja goappátja ávvudallaba Evenskjerraj vuolgátjit. Geldulasj la bessat vuosedit mav buktá, ja aj hávsske oahpásmuvvat iehtjádij sæmmi berustimijn. 

– Dáv lav ájádallam juo dallutjis gå vielljam Jonas sebraj nágin ájge dássta åvddåla. Sjaddá suohtas vijmak gæhttjalit, ja mujna l buorre dåbddo ahte lav nahkam vuosedit dav man åvdås lav hárjjidallam, subtsas Marlene Ellingsen. 

– Muv mielas la geldulasj beru tjuolldemæjvvalibmáj bessat fárruj. Oahpásmuvvá nav moaddásijda sæmmi berustimijn. Navti besav ådå láhkáj åvddånit, ådå hárjjidallij ja ietjá dásen tjiektjat, miejnni Ylva Kjær-Ellingsen. 

Niegadibá Alaskaj bessat

Ájluovta næjtso niegadibá válljiduvvaba ja bessaba Alaskaj fárruj, sæmmi båttå diehteba dåppe li ietjá tjiehpes næjtso gudi tjuolldemæjvvalibmáj sæmmi niegojn båhti. 

– Mån lidjiv læhkám viek dudálasj jus lav akta sijájs gudi Alaskaj bessi mannat, javllá Ylva ja joarkká:  

– Dat luluj niehko mij ålliduvvá. Ij littja dávk ber fárruj bessat, valla sávvi buoremusáv. 

– Suohtas jus bæssá Alaskaj bállov tjievtjatjit, miejnni Marlene. 

Mihá

Tjiehpes nuorra bállotjiektje-guovtes sihtaba Sámev åvdåstit, ja libá mihá gå dálla bessaba. 

– Jus besav sáme rijkkajuohkusij fárruj de lav vuorbálasj, ja nav vuogas luluj Sámev åvdåstit. Mihá lav gå áhtje bieles lav sábme. Mujna l stuorra oasse familjas gudi li sáme, sijá mielas dávk aj littji suohtas, subtsas Ylva. 

– Sidáv Sáme åvdås spellat, låhpat Marlene.