Álgadiddjij mielas la javlla låsså ájgge moaddásijda, ja ihkap sierraláhkáj dán jage. Danen gåhttju aktisasj, nåvkå javllaávvudallamij gájkajda.

– Javllaruohtta gájkajda la prosjækta mav dijmmá álgadijma. Munnu Erling Ramskjellan ælla dal læhkám heva sierra dábe javlajda, ja ávvudallam lin sijáj siegen gejn ælla heva nanos familljadábe jalik åvvånis famillja, álgat Anita Overelv.

Subtsas arvusmahteduvájga gå vuojnijga moatten sajen lándan galgaj ásaduvvat Julaften for alle.

– Dijmmá lij aj vuostasj javlla dårujn Ukrainan, ja edna ådå báhtariddjij bájken. De lij aj luondulasj ájádallat máhtijma dahkat juojddá mij ulmutjijt tjoahkki bæjvváj gånnå dættodip aktijvuodav, familjav, gieresvuodav ja ráfev.

– Jagen 2022 lijma aj "covid-sjævnnjadis bessam" ja besajma máskaj ja restriksjåvnåj dagi æjvvalit. Dálla l ådå ájgge, doarro l Gazan, Ukrainan, juohkka diŋŋga l divrrum ja ådå covid-bárro. De lisj dávk sierraláhkáj hávsske æjvvalit ja dahkat juojddá aktan, miejnni Overelv.

Javlla l soabmásijda låsså ájgge

Anita miejnni javlla máhttá soabmásijda låssåt liehket. Málestit ja njálga biebmoj ja gáhkoj hávsskudallat ja nágin vattáldagáj ja edna buorremielajn máhttá liehket jur dav majt dárbaj hávsskudalátjit.

– Dagu javlliv de ælla munnu Erlingin makkirak ietján dahkat javllaruohta, danen la Javllaruohtta gájkajda munnuj aj gieres ja viek hávsske dahkat. Vehi barggo l gal, valla suohtas gå nav ålos ávvusi, miejnni Anita.

Subtsas moadda viehkke sihke gáhkojt ja javllalájbijt báhkkuji, hiervviji, russtiji ja viehkedi bassusijn maŋŋela. Nágina javllavattáldagájt bukti ja iehtjáda gáhkutjijt doalvvu. Aktan hávsskudallap ja moaddása li viehkken.

– Jus sidá gáhkoj jali vattáldagáj jali juojnak viehkedit, de maná ber Karina ságajda Luojvojdåjmadagán. Javllamállásijda diededa munji (Anita).

– Gájkin buoremus le gå káffa l nåvkå kloahkka 12.00 - 14.00 gaskan, ja mállása iehkeda guovlluj kloahkka 16.00 - 19.00. Mujte val mállásijda diededit! Gijttep Sparebank1 Nord-Norge ruhtadårja åvdås, ja Hábmera Luojvojdåjmadagáv, Hábmera suohkanav ja HIS gå lanjájt ja vædtsagijt bessap luojkkat. Ja gijttep aj Hamsunguovdátjav gå duov dáv málestimvædtsagijt bessap luojkkat váj buktet edna biebmojt málestit, låhpat Anita Overelv.

Luojvojdåjmadagá jådediddje guorras javlla lisj dávk låsså ja vájvve moaddásijda.

– Danen sihtap gájka galggi bessat javlajt ávvudallat. Aktan máhttep hávsskes mujtojt dahkat ållessjattugijda ja mánájda! Vuorbálattja lip gå Anita ja Erling ja då iehtjáda gudi viehkedi, dáv vissji. Sjattasj dávk viek hávsskes ávvudallam javllaruohta, javllá Karina Thorbergsen.

Jårggålam: Lars Th. Kintel