Julie Lien Thomassen årru Stájgon ja guolijt biebmadallá. 21-jagák tjielggi sån la miehtsen måttijt tijmajt jahkáj. Sujna l dábálattjat friddja ålles vahkov ájgen. Dalloj la ienemusát ålggon, lijkku luonnduj ja sierraláhkáj sarvvit.

– Sarvvit la munji læhkám geldulasj nav guhkev gå mujtáv, javllá Julie.

Árrat sarvvigådij

Julie árrat sarvvigådij, ja gijttá áhtjes ja tjietjes gå sunnus la ednagav oahppam sarvvima birra. Gå mánájskåvlås sijddaj bådij, de agev sávaj sijdan lidjin sarvav vuohtjám, váj sijá siegen besaj mannat sarvav gæhttjamin ja dav njuovvat.

– Áhttje muv fáron váldij sarvvimij. Geldulasj ja hávsske lij bessat fárruj, bessiv suv siegen tjåhkkåhit sarvav vuorddemin, jervenláhtjusa sinna kakao gåhpån, subtsas Julie.

Gå Julie stuorránij, de sidáj iesj birssujn mannat. Julie váldij bivdárprøvav jagen 2016, álgij åhpadimbivdujn jagen 2017, ja dallutjis la sæbrram juohkka jage. Nuorra bivdár vuotjij ietjas vuostasj sarvav jagen 2021, ja dallutjis la gålmmå sarva vuohtjám dálátjij.

– Ganugiv nágin bále åvddål duosstiv iehtjam vuostasj sarvav vuohtjet, valla dakkár stuorra juhtusijt nav lahka sivtostit lij agev fijna muossádibme ja oahppiv ålov, duoddis Julie.

Hávsskes mujto

Julie buoremus mujtto bivdos dálátjij la jur suv vuostasj sarvva mav vuotjij. Tjåhkkåhime lij áhtjes siegen, tjáppa biejvve lij ja Julien lij buorre dåbddo. Bena jåhtelit gávnaj gusáv ja stuorra vuovsáv, ja maŋenagi båhtin sunnu vásuk. Navti Julie ietjas vuostasj sarvav vuotjij, 14-snjurtjok vuovsáv.

– Diedá sjattaj ållu surrealismalasj dáhpádus, iv lim goassak jáhkkám muv vuostasj sarvva galgaj nav stuorra judos, valla hávsske lij, ja nav vuogas dåbddo gå buktiv iehtjam vuostasj sarvav vuohtjet. Lidjiv aj jasska gå áhttje lij muv guoran, jus juoga lij dáhpáduvvam. Vuovsá oajvveskálltjo l dálla sijdan ståben, ja dassta lav viek mihá, giehttu Julie.

Nuorajda gudi sihti, valla e rat diede gåktu jali balli vehi álggemis, de Julie alot buorre l rádna siegen álgget, gut aj vehi ballá. Jus la muhtem gesi luohtet, dagu famillja, rádna jali buorre ráddná, de máhttá ánodit fárruj bessat. Ja de máhttá åhtsåt gej siegen bæssá bivddet.

– Álu guláv ulmutja javllá galggá gierddis guhti galggá bivddet, valla ij la dal ållu navti. Álu juoga dáhpáduvvá váj sjaddá viek geldulasj vuordatjit, jali bednagijn vádtset, låhpat Julie.

3 oajvvadusá ma dávk littji hávsske mujttet gå la ålles biejvev bivddemin:

1. Gárvvuna, ja válde val jervengåbttjåsav fáron jus dujna l dakkir. Galmmu jus sjávot tjåhkkåj gætjo biejvev.
2. Válde fárruj nuoges biebmov, liegga juhkusav, ja sjokoláda ij la goassak boasstot!
3.  Doahppi tjijkkarav fárruj jus dujna l, de besa gehtjadit biráldis jus juhtusijt vuojná ietjat birra.

Jårggålam: Lars Th. Kintel