Jårggålam: Lars Th. Kintel
Åhtsåmusás Hábmera suohkanij boahtá åvddån Tysfjord ASVO ájggu vantsajt fállat lájggon, guollit ja vantsajt ájmon anedit, váj sjaddá maritijma birás Ájluovtan.
– Sihtap gæhttjat le gus máhttelis gårvvokájav rieggit duodden suohkana kádjaj Ájluovtan. Duodden ådå hiebadum barggofálaldahkaj de dát aj buktá buorep fálaldagáv ulmutjijda Ájluovtan ja turistajda vantsaj lájgguj, tjállá Divtasvuona ASVO bæjválasj jådediddje Albert Fagernes.
E besa gårvvokájav rieggit
Suohkan dålkku dáv gatjálvissan guoradalátjit makkár máhttelisvuoda li ásadit gårvvokájav Ájluovta ieme kája guoran.
– Guovllo gåsi gårvvokádja l sárgoduvvam le reguleridum industrijjaj ja vuorkudibmáj. Dán regulierima milta ij la sadje gårvvokádjaj. Åvddålijguovlluj galggá suohkan dievddet dáv guovlov váj sjaddá oassen kájas, tjáleduvvá vásstádusán Hábmera suohkana geomatihkkaingeneras Aleksander Rongved.
Geomatihkkaingenerra diedet aj ahte stuorra oasen dat areálas gåsi gårvvokádja l sárgoduvvam la ietjá æjgát gå Hábmera suohkan.
Joarkki plánaj
ASVO jådediddje subtsas barggi joarkke plánaj danen gå miejnniji ulmutja dav ánodi.
– Barggap plánaj åvddålijguovlluj ja miejnnip dát buoragit hiehpá duola dagu gå dáppe l sadje parkerit ja dáppe l ietjá infrastruktuvrra aj. Mijá plána álggin juo binnemusát lågev jage dássta åvddåla, Divtasvuona suohkana bieles, tjielggi Fagernes.
– Ságaj milta máhttá dát sjaddat miellagiddis fálaldahkan, sihke turistajda ja ulmutjijda gudi dáppe Ájluovtan årru ja barggi, låhpat Albert Fagernes.