Guovte biejve badjel æjvvalin 20 julevsáme oahppe Nordlándas sámástittjat, oahppat ienebut sámegiela ja kultuvra birra, ja gájkin åvdemusát nubbe nubbáj oahpásmuvvat.  Knut Hamsun joarkkaskåvllå æjvvalimev ásadij, skåvlå guokta sámegielåhpadiddje Nils-Heika Aira-Andersen ja Arn Offervann dav jåhtuj oattjojga.

- Dát la viek geldulasj, ja hávsske gå dálla lip jådon, javllá Aira-Andersen NuorttaSálto Avijssaj.

Gielav hárjjidallat ja sosialisierit
Danen gå skåvllå la lánda ájnna julevsáme giellaháldadimsuohkanin, de la Nordlánda julevsáme åhpadibme Knut Hamsun JS duogen. Julevsáme giellaåhpadiddje vádnuni, danen skåvlå guokta åhpadiddje åhpadi oahppijt Hábmerin, duodden guhkásåhpadibmáj oahppij Narvijkan, Fuoskon ja Bådådjon. Danen bessin oahppijt tjoahkkit åvdep vahko æjvvalibmáj. Skåvlå mielas la buorre giellabirás ájnas giellaj mav Unesco adná la alvot ájteduvvam.

- Galggap gæhttjalit majt máhttep váj giella åvdeduvvá ja ælládahteduvvá, ja gåktu máhttep nuorajt måvtåstuhttet dav sáhkadittjat. Sávvap giellaæjvvalibme oahppijt måvtåstuhttá ja ahte ienebu válljiji julevsámegielav. Giella ja kultuvrra viessu gå la aktan, ja gå sámegielak oahppe årru ålles Nordlándan de viertti æjvvalimev ásadit. Giellaæjvvalime baktu bessi oahppe oahpásmuvvat ja liehket guhtik guojmesa ja ietjas guhkásåhpadime åhpadiddjij siegen. Bessi sámástit duon dán dåjman, degu bårådijn ja hávsskudaládijn, tjielggi Knut Hamsun JS amásgiellaåhpadiddje ja luohtádusulmusj Elke Kriehn.

- Buorre dáhpádus
Duorastagá ja bierjjedagá lidjin oahppen ålles prográmma måttijn dåjmajn. Bierjjedagá lij giellaåhpadibme ålles biejve. Gå journalissta lij guossen de lidjin jur oahppam gåktu tjubugav tsieggit, låvdaeksperta Sander Andersena baktu. Dåppe gal edna bágojt oahppin! Loavddagin aj gáhkkijin ja káffijin. Bierjjedakiehkeda lidjin
sáme lávllaga ja musihkka gå Lars Magne Andreassen guossidij. Vetle Knutsen ja Noah Johnsen goappátja Ájluoktaj gulluba, valla Bådådjon årroba. Javllaba æjvvalibme lij buorre doajmma, sunnu mielas la hávsske ietjá oahppij ja åhpadiddjij æjvvalit.

- Mijá mielas lij dát buorak. Uddni lip oahppam tjubugav tsieggit. Oanegisfilmav lip aj dahkam, Bukkene Bruse birra. Oahppam lip vehi ienebut gielas. Oahppá ålov dákkir  biejven, javllaba.

- Lihppe gus dákkir æjvvalimen læhkám åvddåla?

- Vuodoskåvlå tjadá lin æjvvalimijn læhkám, valla dát la vuostasj bále joarkkaskåvlån.

- Majt dákkir æjvvalibme dunnuj merkaj?

- Hávsske l bessat sæbrrat. Buorep la iejvvit åhpadiddjijt ja oahppijt gej siegen sámegielav oahppat návti farra gå dáhtásjerma baktu, guorrasibá.

Pilåvttåprosjækta
Æjvvalime maŋŋela subtsas Elke Kriehn vuojnunagi oahppe æjvvalibmáj lijkkujin.  Sávvi æjvvalibme sjaddá álggon váj ienebut barggi julevsáme giela ja kultuvra åvdås joarkkaskåvlå dásen.

- Dát lij muhtem lágásj pilåvttåprosjækta mav dálla galggap árvustallat váj gávnnap  gåktu dákkir dáhpádusájt máhttá buoremus ja dåbmaramos láhkáj ásadit. Diedon dárbahip buorre viehkijt gudi sámásti ja máhtti mijájt viehkedit giellabirrasav åttjudit. Ihkap dákkir dáhpádusá boahtteájggáj sjaddi segadussan julevsáme giellalávggoma ja  foruma gaskan gånnå gájka oahppe skåvlån bessi guhtik guojmesa kultuvra birra oahppat. Sávvap sjaddá buorre aktisasjbarggo dáj vidjurij, javllá Kriehn.