Moarmesmáno låhpan båhtin aktse oahppe ja guokta åhpadiddje Lapplands gymnasiumis, Jåhkåmåhke åssudagás, Knut Hamsun joarkkaskåvlå guossáj. Duov dáv hinnin dáppe, lidjin duola dagu vuostasjklássagij siegen ájrustime, fierván málestime, gibttsomin, lávgudallamin, Hamsunguovdátja ja Árran guossen. Duodden bessin oahppe Vuodnabahtaj vantsajn mannat ietjá oahppij siegen gudi sáme histåvråv ja sebrudagáv studieriji.
Værmádagáv tsieggijin
Áile Utsi la akta dajs oahppijs gudi guossáj båhtin guhti iesj la sábme, ja låhkå sáme prográmmav Lapplands gymnasiumin Jåhkåmåhken. Hábmerij bessin rudáj diehti majt lidjin åhtsåm sáme giellamanojda. Utsi subtsas válljijin Hábmerij mannat danen gå sihtin ietjá julevsáme sebrudagá guossáj. – Hábmer lij viek tjábbe. Viek vuorbálattja lijma dálkijn, javllá 17-jagák. Juoga mav Áile sjaddá tuvras mujttet lij gå lidjin hállan gibttsomin ja bessin muossádit Hábmera sáme kultuvrav. – Manno Vuodnabahtaj lij aj viek hávsske. Åhpajma ållo histåvråv, duola dagu nuppát væráldadoaro birra, subtsas studænnta. Mij dákkir aktisasjbargos máhttá sjaddat? – Åvdemusát li sihke Jåhkåmåhkke ja Hábmer sáme sebrudagá. Gå návti aktan barggap de julevsáme kultuvrav ja gielav nannip. Dat la máj viek unna giella, danen la viehkken váj giella gullu åvddålijguovlluj jus æjvvalip. Hávsske l aj gå da nasjåvnå ma Sámen gávnnuji æjvvali, vásstet Utsi.
Ådå rádna
Tobias Pettersen Strávnjunjes la akta Knut Hamsun joarkkaskåvlå oahppijs guhti l válljim fágav Sáme histåvrrå ja sebrudahka. Sån aj besaj Vuodnabahtaj fárruj. Pettersen fágav válljij gå suv mielas la miellagiddis ja suv mielas dákkir aktisasjbargo li viehkken rádnajt åttjudittjat ja sáme værmádagájt nannitjit.
