Sebastian oassálastij «World’s Strongest Man under 23» Glasgowin, Skottlándan. Geldulasj gilbbusa maŋŋela nagáj Sebastian vuojttet maŋemus vuoron.
– Mujtáv Sebastian 5 jagák guhti skåvlån givseduváj ja sidáj sjaddat buoremussan juojnak, subtsas Sebastian. Mánnárájes juo lij Sebastian ållu visses galgaj buoremussan sjaddat juojnak. Guhkijt åtsåj ja gæhttjalij duov dáv spårtåv dagu bállotjiektjamav åvddål vijmak gávnaj majt iehtsij. 16 jagágin álgij låssådit låggŋit. Dát suv iellemav rievdaj. – Árrat juo mierrediv dánna galgav buoremussan sjaddat, javllá Sebastian. Gievras nuorra ålmåj la vissjalit åhtsåm gåktu máhttá bárránit. Ådå vuogijt la gávnnam. – Gæhttjalam lav agev oahppat sijájs gudi li mujsta tjiehpep, tjielggi áttjak sjaddam væráldavuojtte.Viek låsså árggabiejvve hárjjidallamijn
Sebastian hárjjidallá dábálattjat niellji vahkkuj. Juohkka bále gå hárjjidallá de dat vihpá 2-3,5 tijma ja de målssu makkir diehkkojuohkusav vuorot. Jus i bárep diede de ij dát gullu nav edna hárjjidallamin væráldavuojttáj jus ietjá spårtåj buohtastahttá. Valla dasi l tjielggidus. – Hárjjidallam la nav låssåt muv rubmahij váj dárbahav vuojŋadallat, tjielggi Sebastian. Dijmmá oattjoj væráldavuojtte persåvnålasj hárjjidallev guhti hárjjidallamav pláni, váj galggá åvddånit nav ålov gå ber máhttelis.
Roandemij almma láhkáj gæhttjalittjat
Jagen 2020 mierredij Sebastian Roandemij jåhtet ietjas hásstalittjat. Trønderoajvvestádan besaj gievramusáj vuosstij gilbostallat. Dåppe årrot sjattaj ájnas lávkke åvddånibmáj ja væráldavuojtte nammaj. Riekta birrasin liehket la viek ájnas vájku dal majna gillo, dættot Sebastian. – Jus galggá buorebun sjaddat, de galggá sijáj siegen hárjjidallat guhti li dujsta tjiehpep. Dåppe duodaj dåbddiv makkir dássáj dárbahiv, ja hásstaluvviv juohkka biejve, tjielggi Sebastian.Sierralágásj biebmo
Váj galggá nahkat rubmahav divudallat garra hárjjidallama maŋŋela, stuorrot ja diehkojt åttjudit de li biebmo viek ájnnasa. Dábálattjat bårrå viek ållo ienep gå dån ja mån. Væráldavuojtte biebmo li galla viek sierralágátja. Sesåŋŋa bále bårå gievrro 5000-6500 kalorijja bæjvváj. Dát la viek ållo ienep gå majt gasskamærrásasj ulmusj bårrå. – Gå dájna hæjtáv de hæhttuv diedon aj bårråmav binnedit, javllá Sebastian.Ájggu sjaddat lánda gievramussan
Sebastian ij ájgo vuollánit dal ájn. Måvtuk la joarkátjit, danen gå dåbddå sujna l potensiálla. Suv stuorra niehko l nágin biejve sjaddat Vuona gievramus ålmåj. Åvdep bále gå NM:an oassálastij de vidádin bådij, dálla l sujna ájn ienep ájggomusá. – Mujna l akta oajvveulmme, ja dat la sjaddat Vuona gievramussan, låhpat Sebastian Helland.
