Drømmer i Salten la njuolgga boados Salten Kultursamarbeid, European Capital of Culture jali gåktu l ienemusát dåbddusin; Bodø2024. Niegojt oadtju moatte láhkáj, kultuvrraskåvlåj, skåvlåj ja girjjevuorkáj dájdda- ja tjállemdáhpádusáj baktu, ja jåhtte niehkotjoahkkárij baktu gej NSA l ságastam.

Steinar Pleim Johansen ja Kaja Nystadbakk bådijga Hábmerij ja Stájgguj sunnu kultuvrraprosjevtajn «Drømmer i Salten». Trádnás davvelin gitta Árranij Ájluovtan li manádam ja bájke ulmutjijs ánodam niegojt.

– Mij sávvap Sálto viesáda galggi ienebut niegadit iellemisá ja boahtteájgesa hárráj. Danen manádip Sáltov birra ulmutjijt ságájdahttemin. Pládna l vuosádusáv dahkat divna niegojs majt tjoahkkip, váj vuosedip majt Sálto ulmutja niegadi ja subtsastittjat man ájnnasa niego li, subtsas Kaja.

– Valla manen la nav ájnas niegadit?

– Mijájn juoga dáhpáduvvá gå niegoma jieddnát subtsastip ja gå iehtjádij dajt juogadip. Sierraláhkáj gå aj vuojnnep majt iehtjáda niegadi, danen gå dalloj ájádallagoahtá mij la duodaj muv iehtjam niehko. Gå niegoma juogadip de la juokkirak lágásj fábmo mijá sinna mij smaret, javllá Steinar.

Liegga vájmo sijdabájkesa åvdås

Steinar ja Kaja giehttoba ájtsajga juojddá aktisasj sijáj gaskan gejt ságájdahttin Hábmerin ja Stájgon. Ájttsam li juojddá mij ednagav giehttu dan birra gåktu Hábmera álmmuk sijdabájkesa birra ájádalli.

– Divna nuora gejt lip ságájdahttám gullunagi li viek tjanádum sijdabájkijda. Jus ájggu nágin gaskav mannat studieritjit jali majduk, de ajtu sihti máhttsat sijdabájkijda. Dat la viek hávsske, subtsas Steinar.

– Dat la viek sierralágásj dáppe Hábmerin ja Stájgon. Gåktu álmmuk soapptsu ja viek berusti sijdabájkesa åvdås. Munnuj la fijna muossádibme dakkár sadjáj boahtet gånnå gájka li nav mihá sijdabájkesa åvdås, duoddis Kaja.

Tjavtja 2024 nalluj galggi divna niego prosjevtan tjoahkkiduvvat girjijda, videodájddagij ja sávvap buktep Sálto niegojt bájkálasj politihkkárijda gaskostit. Prosjevta åvdåstiddje jáhkkeba dát sjaddá geldulasj ja sierralágásj vædtsak mijá guovlov åvddånahtátjit.

Jårggålam: Lars Th. Kintel